Düýn paýtagtyň Büzmeýin etrabyndaky 10 müň orunlyk sport toplumynda Altyn asyr we Ahal toparlarynyň arasynda Türkmenistanyň çempionatynyň 14-nji tapgyrynyň duşuşygy geçirildi. Dört gol geçirilen duşuşykda ýeňiş gazanan tarap bolmady.
Ahal 47-nji minuda çenli Elman Tagaýewiň we Meýlis Diniýewiň geçiren gollary bilen öňe saýlanan hem bolsa, bu üstünligini duşuşygyň ahyryna çenli gorap bilmedi. 66-njy minutda Myrat Annaýewiň dürs peýdalanan 11 metrlik jerime urgusy bilen hasaby ýygran Altyn asyr 84-nji minutda Ahalyň jerime meýdançasyndaky dartgynly pursatlarda Ata Geldiýewiň öz derwezesine pökgi geçirmegi bilen hasaby deňledi. Şeýlelikde, duşuşyk 2:2 hasabyndaky deňlik bilen tamamlandy.
Eger ykbaly heniz çenli çözülmedik Şagadam ― Altyn asyr duşuşygyndaky (Altyn asyr 2:0 hasabynda ýeňiş gazanyp durka, duşuşyk ýatyryldy) netijäni hem goşsak, onda iki topar hem utugyny 25-e çykardy. Türkmenbaşy şäherindäki duşuşygyň ykbaly çözülmedik hasap etsek bolsa, Ahalda 25, Altyn asyrda bolsa 22 utuk bar. Bu toparlar ýaryş tertibinde birinji we ikinji orunlary paýlaşýarlar.
15-nji tapgyrda Ahal Nebitçini kabul eder, Altyn asyr bolsa Aşgabadyň myhmany bolar. Türkmenistanyň Futbol federasiýasy geljek tapgyryň duşuşyklarynyň 14-nji we 15-nji maýda geçiriljekdigini habar berýär.
Altyn asyr Ahal 2:2
Gollar: 66 (11 m.j.u.) Myrat Annaýew, 84 Ata Geldiýew, öz derwezesine 16 Elman Tagaýew, 47 Meýlis Diniýew.