Häzirki wagtda türk kompaniýalary möçberi 4,4 milliard dollar bolan 19 taslamany durmuşa geçirýärler. Bu barada Türkiýäniň Türkmenistandaky ilçisi Ahmet Demirok maglumat berdi.
A.Demirok Türkmenistanyň Garaşsyzlyga eýe bolan gününden başlap, türk kärhanalarynyň müňden gowrak taslamany üstünlikli tamamlandyklaryny, munuň türk kompaniýalaryna türkmen tarapyndan ýokary ynam bildirilýändigine şaýatlyk edýändigini belledi. Bu barada “Neýtralnyý Türkmenistan” gazetiniň sişenbe günündäki sanynda habar berilýär.
Ilçiniň sözlerine görä, türk kompaniýalary elektrik stansiýalary, elektrik geçiriji ulgamlary, awtomobil ýollary, ýaşaýyş toplumlary, söwda merkezleri, ýokary we orta okuw mekdepleri, jemgyýetçilik binalary, myhmanhanalary, fabrikleri, muzeýleri, seýilgähleri we hassahanalary öz içine alýan köpsanly iri infrastruktura taslamalary durmuşa geçirdiler.
Ol türk kompaniýalarynyň Arkadag “akylly” şäheriniň gurluşygynyň indiki tapgyrlaryna we “Aşgabat-siti” taslamasyna gatnaşmagyna umyt bildirdi.
2024-nji ýylyň ýanwar-awgust aýlarynda Türkmenistan bilen Türkiýäniň arasynda haryt dolanyşygy $1,532 milliarda ýetdi. Bu geçen ýylyň degişli döwründäkiden 16 göterim köpdür diýip, Türkiýäniň Türkmenistandaky ilçisi Ahmet Demirok aýtdy