Star gazedi: "Iki ýurtdan umumy Gaza ýüzlenmesi" söz başyly habarynda, Türkiyäniň prezidenti Rejep Taýýip Erdoganyň Özbegistanyň prezidenti Şewket Mirziýoýew bilen geçiren umumy metbugat ýygnagynda: "Gazada ezilenlere garşy edilýän zulumyň bes edilmegi üçin çagyryş berýäris. Özbegistanyň iki döwletli çözgüdi goldamagy sebäpli minnetdarlyk bildirýäris" diýendigini okyjy köpçüliginiň dykgatyna ýetirýär. Özbegistanyň prezidenti Şewket Mirziýoýew bolsa: "Gazada durnukly we hemişelik parahatçylyga ýetmek üçin elbetde garaşsyz we azat Palestina döwletiniň gurulmagy hökmany" diýip belledi.
Sabah gazedi: "Terrora garşy göreşde üstünlik dessany" söz başyly habarynda, Türkiyäniň Milli Goranmak ministrliginiň Yragyň we Siriýanyň demirgazygy bilen birlikde geçirilen operasiýalarda soňky 1 hepdede 59 terrorçynyň täsirsiz ýagdaýa getirilendigini aýdandygyny habar berýär.
Ýeni Şafak gazedi: "ABŞ: Türkiye bilen F-16 boýunça ylalalşyk tamamlandy" söz başyly habarynda, ABŞ-nyň Döwlet sekretarlygynyň: "Türkiye F-16 harby uçarlaryny satyn almak üçin teklip we kabul ediş hatyna gol çekdi" diýendigini mälim edýär.
Tapgyryň tamamlanmagy bilen birlikde Türkiye ABŞ-dan 40 sany F-16 Blok 70 harby uçar bilen 79 sany F-16 modernizasiýa toparyny satyn alar.
Haber Türk gazedi: "Stambul howa menzili ýolagçylaryň artyşynda sanawyň ýokarysynda" söz başyly habarynda, Ýewropanyň Halkara howa menzilleri geňeşiniň (ACI EUROPE) maglumatyna görä, "Majors howa menzilleri" kategoriýasynda Stambul howa menziliniň, 2024-nji ýylyň aprel aýynda pandemiýadan ozalky 2019-njy ýylyň aprel aýyna garanyňda 22,4 göterimlik artyş bilen, ýolagçy sanyny iň köp artdyran ilkinji 5 howa menziliniň sanawynda 1-nji oruna mynasyp bolandygyny beýan edýär.
Hürriýet gazedi: "Antalýa syýahatçylykda 4 million rekordy" söz başyly habarynda, Syýahatçylykda şu ýyl ähli wagtlaryň rekordyny täzelemäge dowam edýän Antalýada 1-nji iýuna çenli 4 million çäginiň geçilendigini habar berýär. Antalýa we Gazipaşa howa menzillerine gonan daşary ýurtly syýahatçylaryň sany 4 million 25 müň 592 adam boldy.