Türkmenistanyň Belgiýadaky ilçisi Sapar Pälwanow Özbegistandan täze bellenen kärdeşi Gaýrat Fozilow bilen duşuşdy. Duşuşykda soňky ýyllarda Aşgabat bilen Daşkentiň arasyndaky gepleşikleriň giňelmegi barada pikir alşyldy diýlip, türkmen diplomatyk wekilhanasy habar berýär.
Diplomatlar şeýle hem ÝB bilen Merkezi Aziýanyň arasynda sebitara gepleşiklere ygrarlydyklaryny aýtdylar. Bu gepleşikleriň möhüm depginler gazanyp, täze sepgitlere ýetip, hyzmatdaşlygy we özara düşünişmegi güýçlendirýändigini bellediler diýlip, habarda bellenilýär.
Taraplar ählumumy diplomatiýada üstünlik gazanmak üçin halkara guramalaryň çäginde özara goldawy tassyklaýan dürli ugurlardaky hyzmatdaşlygyň ösýändigini hem bellediler.