28-29-njy sentýabrda Astanada neşe syýasaty boýunça sebitleýin Dialog geçirildi. Oňa Merkezi Aziýanyň degişli döwlet edaralarynyň, Ýewropa institutlarynyň, raýat jemgyýetleriniň, halkara guramalaryň we sebitleýin hyzmatdaşlyk maksatnamalarynyň wekilleri gatnaşdylar.
Dialogyň maksady, esasan, Merkezi Aziýanyň esasy gyzyklanýan taraplarynyň arasynda dinamiki ara alyp maslahatlaşmagy ýeňilleşdirmekden, Merkezi Aziýada neşäniň ýagdaýyna syn bermekden, häzirki neşe syýasatynyň ýagdaýyny, neşe syýasatyna abanýan howplary we üpjünçilige gözegçilik etmekdäki kynçylyklary ara alyp maslahatlaşmakdan ybarat boldy.
Duşuşyga gatnaşanlar möhüm meseleleri we olar bilen bagly häzirki ýagdaýy gözden geçirdiler, Ýewropanyň öňdebaryjy tejribesini öwrendiler. Dialogyň dowamynda aýry-aýry sessiýalar, neşe syýasatyny üstünlikli ösdürmek we durmuşa geçirmek üçin täsirli gural hökmünde, gyzyklanýan taraplary okatmaklyga bagyşlandy.
Neşe syýasaty boýunça sebitleýin Dialog Ýewropa we Merkezi Aziýa guramalarynyň arasynda özara maslahatlaşmagy we hyzmatdaşlygy ösdürmäge goşant goşjak nobatdaky möhüm ädimdir diýip, çeşme belleýär.