Balkan welaýatynyň Türkmenbaşy etrabynyň Gyzylgaýa şäherçesiniň çäginde ýerleşýän Çagyl ýatagynyň Gyzylgaýa-V meýdançasynda demir magdanlary ýüze çykaryldy. Bu barada prezident Gurbanguly Berdimuhamedowa 5-nji aprelde wise-premýer Mämmethan Çakyýew habar berdi.
TDH-nyň habar bermegine görä, magdan ýatagynda demir magdanynyň 70-75 million tonna möçberindäki gorlary ýüze çykaryldy, tapylan magdanyň düzüminde demriň mukdary 20 göterime deň. Häzir alnan demir magdanynyň tehnologik synag işlerini kärhanalarda geçirmek meýilleşdirilýär.
Prezident bar bolan magdan gorlarynyň we beýleki baýlyklaryň netijeli peýdalanylmagy, olaryň gaýtadan işlenilmegi bilen baglanyşykly meselelere ähmiýet berilmeginiň möhümdigini belledi.
Ýatladýarys, Gurbanguly Berdimuhamedow 2018-nji ýylyň noýabrynda “Türkmengeologiýa” döwlet kompaniýasyndan täze magdan ýataklaryny gözläp tapmagy talap etdi.
Myratgeldi Meredow 18-nji ýanwarda prezidente ýurtda agyz suwunyň täze ýatagynyň, şeýle-de, ýerli gurluşyk materiallaryny öndürmäge mümkinçilik berjek mineralyň tapylandygyny habar berdi.