Türkmenistanly ýaş gimnastikaçylar Özbegistanyň Daşkent şäherinde geçirilen halkara ýaryşda medallaryň 20-sine mynasyp boldular. Fiza Aýwazowanyň şägirtleri altyn medallaryň 12-sini, kümüş medallaryň 7-si we bir sany bürünç medal gazanmagy başardylar.
Türkmen ýygyndysynyň altyn medallaryny guralsyz çykyş etmek boýunça 53-nji orta mekdebiň 4-nji synp okuwçysy Hatyja Akmuradowa, paýtagtymyzdaky A.S.Puşkin adyndaky umumy bilim berýän türkmen-rus orta mekdebiniň okuwçysy Sofiýa Bens, Türkmenistanyň Gimnastika federasiýasynyň türgeni Iliana Tokarewa, toply çykyş etmek boýunça paýtagtymyzdaky ýöriteleşdirilen 27-nji orta mekdebiň 5-nji synp okuwçysy Mahym Gurbanowa, bulawaly çykyşda ýöriteleşdirilen 27-nji orta mekdebiň 7-nji synp okuwçysy Fatima Kambarowa, bilelikdäki Türkmen-türk mekdebiniň okuwçysy Ada-Aýlin Günaslan, halkaly çykyş boýunça 42-nji orta mekdebiň 7-nji synp okuwçysy Sara Gulberdiýewa, 12-nji orta mekdebiň 7-nji synp okuwçysy Mähri Pomanowa, 44-nji orta mekdebiň 8-nji synp okuwçysy Weronika Kurdupowa, ýöriteleşdirilen 16-njy orta mekdebiň 8-nji synp okuwçysy Mähri Orazowa, Aşgabat şäherindäki bilelikdäki Türkmen-türk mekdebiniň okuwçysy Firdews Günaslan we 13-nji orta mekdebiň 10-njy synp okuwçysy Mähri Berdiýewa dagylar gazandy.
Guralsyz çykyşlarda Aşgabat şäherindäki 55-nji orta mekdebiň 3-nji synp okuwçysy Narmina Abasowa, A.S.Puşkin adyndaky umumy bilim berýän türkmen-rus orta mekdebiniň okuwçysy Ameliýa Bens, toply çykyş etmek boýunça 42-nji orta mekdebiň 5-nji synp okuwçysy Leýli Batyrowa, uly halkaly çykyşda Türkmenbaşy şäherindäki 6-njy orta mekdebiniň 7-nji synp okuwçysy Aýsen Abdyllaýewa, halkaly çykyşlarda Aşgabat şäherindäki ýöriteleşdirilen 6-njy orta mekdebiň 8-nji synp okuwçysy Leýli Işankuliýewa, 50-nji orta mekdebiň 9-njy synp okuwçysy Karolina Kim we Mary şäherindäki 14-nji orta mekdebiň 9-njy synp okuwçysy Gülşat Berkeliýewa dagylar halkara ýaryşyň kümüş medallaryna mynasyp boldular.
Türkmen ýygyndysynyň ýeke-täk bürünç medalyny bolsa 15-nji orta mekdebiň 8-nji synp okuwçysy Inara Hanowa gazandy.
Halkara ýaryşa türkmen türgenlerinden başga-da, Russiýa Federasiýasynyň, Ukrainanyň, Birleşen Arap Emirlikleriniň, Gyrgyz Respublikasynyň, Gazagystanyň şäherleriniň üçüsiniň, Özbegistanyň sebitleriniň bäşisiniň toparlary gatnaşdy. Ýaryşa Türkmenistandan wekilçilik eden 21 türgeniň 20-siniň medal gazanmagy iňňän ýokary netijedir. Bu netije ýurdumyzda sportuň gimnastika görnüşiniň parlak geljeginiň bardygyny buşlaýar.