Prezident Gurbanguly Berdimuhamedow 9-njy martda Ministrler kabinetiniň mejlisini geçirdi we onuň dowamynda Türkmenistanyň prezidentiniň ýakyn wagtda Kuweýt döwletine we Birleşen Arap Emirliklerine resmi sapar etmegine taýýarlyk görülýändigi habar berildi.
“Döwlet baştutany Kuweýt we BAE bilen gatnaşyklaryň netijeli häsiýete eýedigini kanagatlanma bilen belläp, ikitaraplaýyn ykdysady hem-de söwda gatnaşyklaryny ösdürmek, maýa goýum işini we işewür gatnaşyklary işjeňleşdirmek hem-de medeni-ynsanperwer ulgamda gatnaşyklary çuňlaşdyrmak üçin ägirt uly kuwwatyň bardygyny nygtady” diýip, TDH döwlet habar gullugy habar berýär.
Daşary işler ministrliginiň ýolbaşçysy Reşit Meredowa saparlara taýýarlyk görmek we olaryň ýokary guramaçylyk derejesini üpjün etmek boýunça degişli tabşyryklar berildi.
Ýatladýarys, Türkmenistanyň prezidenti Gurbanguly Berdimuhamedow 20-nji dekabrda BAE-niň daşary işler ministri Zaýed Al Nahaýanyň baştutanlygyndaky delegasiýasyny kabul etdi. Şonda, TDH-nyň maglumatyna görä, “arap maýadarlary TOPH gaz geçirijisi proýektiniň durmuşa geçirilmegine gyzyklanma bildirdiler”.
11-nji ýanwarda Birleşen Arap Emirliklerinde Türkmenistanyň daşary işler minitriniň orunbasary Berdinyýaz Mätiýew bilen BAE-niň daşary işler we halkara hyzmatdaşlygy ministri, şeýh Abdulla bim Zaýed Al Nahýanyň duşuşygy boldy.