Türkmenistanyň Prezidenti Serdar Berdimuhamedow bilen Özbegistan Respublikasynyň Prezidenti Şawkat Mirziýoýew duşenbe güni Daşkent şäherinde “ŞabatDaşoguz” atly bilelikdäki serhetýaka söwda zolagynyň açylyş dabarasyna gatnaşdylar. Bu barada Özbegistanyň Prezidentiniň resmi metbugat gullugy habar berýär.
Täze söwda zolagynda administratiw bina, degişli gümrük we karantin, fitosanitariýa we weterinariýa hyzmatlarynyň binalary, şeýle hem söwda pawilýony bilen ammar toplumlary gurlup işe girizildi.
Zolagyň çäginde “bir penjire” ulgamy giriziler, interaktiw platformalar, bank we lukmançylyk hyzmatlary, myhmanhana desgalary hereket eder. Mundan başga-da, zolaga gelip-gidýänler üçin giň awtoduralga döredildi.
Bu zolagyň işe girizilmegi Özbegistanyň Horezm welaýaty bilen Türkmenistanyň Daşoguz welaýatynyň arasynda söwda-ykdysady gatnaşyklary giňeltmäge giň mümkinçilik berer.
Mundan başga-da, Türkmenistan bilen Özbegistan “Alat — Farap” sebitinde hem serhetýaka söwda zolagyny döretmek barada ylalaşdylar.