ABŞ-nyň Nýu-Ýork ştatynyň wekili Hakim Jeffris ABŞ-nyň Kongresiniň Wekiller palarasynda Demokratik partiýanyň fraksiýasynyň başlyklygyna saýlanyp, 82 ýaşly Nensi Pelosiniň ornuna geçdi.Partiýa içindäki ses berişlik netijesinde demokratlar 52 ýaşly Jeffrisi fraksiýanyň başlygy wezipesine saýladylar. Şeýlelikde, Jeffris ABŞ-nyň Kongresiniň palatalarynyň birinde partiýa fraksiýasynyň başlygy wezipesine saýlanan ilkinji garaýagyz boldy.
Ol täze ýyldan başlap, golaýda geçirilen aralyk saýlawlarda ABŞ-nyň kanun çykaryjy palatasynda köplügini ýitiren demokratlaryň başlygy wezipesine girişer.
Nensi Pelosi demokratlaryň lideri hökmünde gaýtadan saýlanmak islemeýändigini, ýöne Kongresiň aşaky palatasynda işlemegini dowam etdirjekdigini aýdyp, Jeffrisiň saýlanmagynyň partiýa “energiýa, täze pikirleri we perspektiwalary” berjekdigini aýtdy.
2007-nji ýylda Nensi Pelosi Kongresiň aşaky palatasynyň başlygy bolup, şol döwürde demokratlar aşaky palatada köplük gazanypdyrlar. 2011-nji ýylda demokratlar köplügini ýitirenden soň, azlyk toparlaryň ýolbaşçysy wezipesine geçdi. 2019-njy ýylda respublikanlar aşaky palata gözegçiligini ýitirenden soň, spiker wezipesine gaýdyp geldi. Nensi Pelosi 1987-nji ýyldan bäri Kongresde işleýär.
Jeffris 2013-nji ýyldan bäri Kongresiň Wekiller Palatasynda Nýu-Ýorkuň 8-nji saýlaw okrugyna wekilçilik edýär. Ol 2019-njy ýyldan bäri aşaky palatada demokratlaryň fraksiýasynda partiýanyň içki mejlisine başlyklyk etdi.
8-nji noýabrda geçirilen aralyk saýlawlaryň netijesinde demokratlar Wekiller palatasynda köplügini ýitirdi, oňa gözegçilik respublikan partiýasynyň ygtyýaryna geçdi. Şunuň bilen baglylykda, Kongresiň aşaky palatasynyň indiki spikeri respublikan bolar. Garaşylyşy ýaly, bu wezipäni ýakyn wagtda Wekiller palatasynyň respublikan azlygynyň lideri bolup işleýän Kewin Makkarti eýelär.