Geçen hepdäniň anna güni Günorta Koreýanyň Phýonçhan şäherinde başlanan XXIII gyşky Olimpiýa oýunlary ýokary depginde dowam edýär.Häzirki wagtda 1 hepdesi tamamlanan sport baýramçylygynda medallaryň sanawynda germaniýaly Olimpiýaçylar öňde barýar.
Olar 16-njy fewrala çenli geçirilen ýaryşlarda 9 altyn, 2 kümüş hem-de 4 bürünç medal gazandylar. 6 altyn, 7 kümüş we 5 bürünç medal alan norwegler 2-nji ýeri eýeleýär. 5 altyn medally Gollandiýa (5 kümüş, 2 bürünç) bilen ABŞ (1 kümüş, 2 bürünç), 34-nji orunlary paýlaşýarlar. Ýer eýeleri Günorta Koreýanyň wekilleri häzirlikçe 2 altyn medal gazanyp, 10-njy orunda barýarlar.
* Sanili sporty boýunça bäsleşikler tamamlanyp, 4 altyn medalyň 3-sini germaniýaly türgenler almagy başardy.Olar zenanlaryň arasyndaky ýekeleýin, jübütleýin hem-de toparlaýyn ýaryşlarda altyn medala mynasyp boldy.
Germaniýaly Natalie Geisenberger Soçiden soň, Phýonçhanda-da ýekelikde hem-de toparlaýyn ýaryşlarda altyn medal gazandy.Erkekleriň arasyndaky ýekeleýin bäsleşikde-de awstriýaly Dewid Gleirşer ýeňiji boldy.* Konkili typmak boýunça geçirilen ýaryşlarda 3 sany Olimpiýa rekordy goýuldy.
Erkekleriň arasynda bu sportuň öňdebaryjy ýurdy hasaplanýan Niderlandlaryň türgeni Swen Kramer 5000 metr ýaryşynda altyn medaly rekord dereje bilen gazandy.Bu onuň 3-nji Olimpiýa altyn medalydyr. 1500 metr ýaryşynda-da başga bir gollandiýaly Kýeld Nuis ýeňiş gazandy. 10000 metr bäsleşiginde bolsa, kanadaly Ted-Ýan Blumen Olimpiýa rekordyny täzeläp, altyn medalyň eýesi boldy.
Ol 5000 metr bäsleşiginde bolsa, 2-nji ýeri aldy.* Konkili typmak boýunça zenanlaryň arasynda 1000 metrde gollandiýaly Ýorin Ter Mors altyn medalynyň üstüne Olimpiýa rekordyny hem gazandy. 1500 metrde gollandiýaly Iren Wýust ýeňiş gazanyp, karýerasyndaky 5-nji Olimpiýa altyn medalyna mynasyp boldy. Şeýle-de 3000 metrde-de gollandiýaly Karleýn Ahtereke ýeňiş gazanmagyň hötdesinden geldi.
Ol watandaşlary Iren Wýust hem-de Antoinette de Ýongdan öňe saýlandy.* Snoubord ýaryşlarynyň sloupstaýl görnüşi boýunça erkekleriň arasynda amerikaly Redmond Jerard 87,16 utuk bilen ýeňiş gazandy.Ol XXI asyrda dünýä inip, gyşky Olimpiadada altyn medal gazanan ilkinji erkek türgen boldy.* Snoubord ýaryşlarynda zenanlaryň arasynda halfpaýp görnüşi boýunça amerikaly Hloe Kim 3-nji synanyşygynda 98,25 utuk toplap, altyn medala mynasyp boldy.
Asly Günorta Koreýadan bolan 17 ýaşly Kim gyşky Olimpiýa oýunlarynda 2000-nji ýyldan soň doglup, altyn medal alan ilkinji zenan türgen diýen ady eýeledi.* Snoubord ýaryşlarynyň sloupstaýl görnüşi boýunça zenanlaryň arasynda amerikaly Jeými Anderson Soçiden soň, Phýonçhanda-da altyn medala mynasyp boldy.
Ol 1998-nji ýyldan bäri Olimpiýa oýunlarynyň maksatnamasynda bar bolan snoubord boýunça 2 altyn medal alan ilkinji zenan türgen diýen ady eýeledi.* Figuralaýyn typmak boýunça toparlaýyn ýaryşda 73 utuk toplan Kanadanyň ýygyndysy altyn, Russiýadan gatnaşýan Olimpiýaçylar kümüş hem-de amerikaly türgenler bürünç medala mynasyp boldy.
Russiýaly Ýewgeniýa Medwedewa ýekelikde görkezen gysga çykyşynda 81,06 utuk toplap, bu ugurdan Olimpiýa rekordyny goýdy.* Figuralaýyn typmak boýunça jübütleýin ýaryşda germaniýaly Aliona Sawçenko bilen Bruno Masso ikisi Olimpiadanyň çempiony boldy.
Bu ugurda Suý Wenszin bilen Han Sun (Hytaý) 2-nji, kanadaly Megan Dýuamel bilen Erik Redford 3-nji orny eýelediler.* Dag lyžasynyň kombinasiýa görnüşinde erkekleriň arasynda soňky ýyllaryň ussat türgeni awstriýaly Marsel Hirşer ilkinji gezek Olimpiýa oýunlarynda altyn medala mynasyp boldy. 6 gezek Dünýä Kubogynda çempionlyk gazanyp, slalomda has üstünlik görkezen 28 ýaşly Hirşerden soň, 23-nji orunlary fransiýaly lyžaçylar Aleksis Pentýuro bilen Wiktor Mýuffa-Žande eýeledi.* Dag lyžasynyň gigant slalom ýaryşynda zenanlardan amerikaly Mikaela Şiffrin ýeňiş gazandy.
Norwegiýaly Ragnhil Muwinkel 2-nji, italiýaly Federika Brinione 3-nji ýeri eýeledi. Şiffrin Soçide hem slalom ýaryşynda altyn medal alypdy.* Dag lyžasynyň daunhill görnüşinde erkekleriň arasynda norwegiýaly Aksel Lund Swindal altyn medala mynasyp boldy.
Wankuwer 2010-da 3 medal alan Swindalyň Olimpiýa medallarynyň sany 4-e ýetdi.Swindaldan soň, 2-nji orny watandaşy Hietil Ýansurd, 3-nji ýeri-de şweýsariýaly Beat Foýs eýeledi.* Körling boýunça garyşyk jübütleriň arasyndaky bäsleşigiň finalynda kanadaly Keýtlin Lous Jon Morris ikisi şweýsariýaly Ženni Perri bilen Martin Riosy 10:3 hasabynda ýeňdi.
Olimpiýa oýunlarynyň çäklerinde ilkinji gezek geçirilen bu garyşyk jübütleriň ýaryşynda Russiýadan gatnaşýan olimpiýaçylar 3-nji orna mynasyp boldy.Anastasiýa Brizgalowa bilen Aleksandr Kruşelniskiý ikisi Russiýanyň ýygyndysyna körlingde ilkinji Olimpiýa medalyny gazandyrdy.* Biatlon ýaryşlarynda 24 ýaşyndaky germaniýaly zenan Laura Dalmaýer 3 medal gazandy.
Ol sprint 7,5 kilometr hem-de yzarlamak 10 kilometr bäsleşiklerinde altyn medala, garyşyk 15 kilometrde-de bürünç medala mynasyp boldy.Olaryň soňky ikisinde-de kümüş medallary slowakiýaly Anastasiýa Kuzmina gazandy.
Garyşyk 15 kilometr ýaryşynda altyn medal şwesiýaly Hanna Ebergiňki boldy.* Fristaýlyň mogul görnüşinde erkekleriň arasynda kanadaly Mikael Kingberi altyn medala mynasyp boldy. 20112017-nji ýyllar aralygynda ähli Dünýä Kubogynda-da çempion bolan we Soçide kümüş medal alan 25 ýaşly türgen bu başarnygynyň üstüni Olimpiýa altyn medaly bilen ýetirdi.
Awstraliýaly Mett Grem 2-nji, ýaponiýaly Daiti Hara 3-nji orny eýeledi.* Fristaýlyň mogul görnüşinde zenanlaryň arasynda fransiýaly Perrin Laffron altyn, kanadaly Žýustin Dýufur-Lapuant kümüş, gazagystanly Ýuliýa Galyşewa bürünç medal gazandy.* Şort-trek ýaryşlarynda zenanlaryň arasynda italiýaly Arianna Fontana 500 metri 42,569 sekuntda geçip, altyn medala mynasyp boldy.
Bu ugurda gollandiýaly Ýara Wan Kerkhof 2-nji, kanadaly Kim Butin 3-nji ýeri eýeledi.* Şort-trek 1500 metr ýaryşlarynda erkekleriň arasynda ýer eýesi Günorta Koreýanyň türgeni Hýo-žun Lim altyn medal gazandy.
Gollandiýaly Sýinkie Knegt kümüş, Russiýadan gatnaşýan olimpiýaçylar toparynyň wekili Semýon Ýelistratow bürünç medala eýe boldy.