Dubaý şäherinde (BAE) pauerlifting boýunça mümkinçilikleri çäkli türgenleriň arasynda tamamlanan dünýä Kubogy ugrunda ýaryşlarda Türkmenistanyň ýygyndy topary bir altyn we iki kümüş medala mynasyp bolup, ýokary derejeli ýaryşlarda iň gowy netijeleriň birini görkezdiler.
Halkara derejeli sport ussady Maýagözel Ekäýewa 79 kilograma çenli agram derejede 108 kilogram agramy göterip, birinji orna mynasyp boldy. 97 kilograma çenli agram derejede Baýramgeldi Saparow kümüş medala eýe boldy.
Onuň görkezen 190 kilogram netijesi şeýle üstünlik gazanmaga mümkinçilik berdi. Ýygyndy toparymyzda bu ýaryşlarda 72 kilograma çenli agram derejede Sergeý Meladze kümüş medal bilen baýrakly orny alan üçünji türgenimiz boldy. Şeýle üstünligiň gazanylmagyna paralimpiýaçy türgenleriň tälimçisi, Türkmenistanyň at gazanan tälimçisi Tahyr Şorahanow uly goşant goşdy.
Pauerlifting boýunça dünýä Kubogy ugrundaky ýaryşda şeýle üstünlikleriň gazanylmagy türgenlerimize şu ýyl Indoneziýanyň paýtagty Jakarta şäherinde geçiriljek Aziýa oýunlaryna gatnaşmak mümkinçiliklerini ýakynlaşdyrdy.