Dünýäniň iň abraýly film festiwallarynyň hatarynda görkezilýän Kann film festiwaly ertir tamamlanar. 74-nji gezek geçirilýän festiwalda Altyn palma (Palme d’Or) baýragyna 24 film dalaşgär görkezilipdi.
Filmleriň arasynda niderland režissýory Pol Werhoweniň Benedetta, eýranly Oskaryň eýesi Asgar Farhadiniň Gahryman (Ghahreman), Wes Andersonyň Fransuz habarlary (The French Dispatch), oskarly aktýor hem-de režissýor Şon Penniň Baýdak güni (Flag Day), awstraliýaly Jastin Kurzeliň Nitram, fransiýaly Jak Odiaryň Pariž, 13-nji etrapça (Les Olympiades), russiýaly Kirill Serebrennikowyň Petrowyň griplemegi (Petrovy v grippe), fransiýaly Fransua Ozonyň Hemme zat gül ýaly geçdi (Tout s’est bien passé), tailandly Apiçatpong Weerasethakulyň Ýatlama (Memoria), italiýaly Nanni Morettiniň Üç gat (Tre piani), fransiýaly Bruno Dumonyň Fransiýa (France) ýaly kinolary dalaşgärlige hödürlenipdi.
Amerikaly režissýor Spaýk Liniň baştutanlyk edýän eminler toparynda senegally aktrisa Mati Diop, kanadaly aýdymçy Milen Farmer, amerikaly aktrisa Maggi Gillenhaal, awstriýaly režissýor Jessika Hausner, fransiýaly aktrisa Melani Loren, braziliýaly režissýor Kleber Mendonsa Filio, fransiýaly aktýor Tahar Rahim, koreýaly aktýor Son Kang-ho ýaly belli şahsyýetler bar.