Amerikanyň Birleşen Ştatlarynyň Waýoming ştatynda ýerleşýän Uolt Disneýiň maşgalasyna degişli bolan ranço 71 million dollar baha kesilip, satuwa çykaryldy. Bu barada The Wall Street Journal gazeti habar berdi diýip, Trend ýazýar.
Ýelloustoun milli seýilgähinden 37 kilometrlikdäki ranço 2 müň gektary eýeleýär, ol üç tarapyndan dag bilen gurşalan ajaýyp künjekde ýerleşýär.
Uolt Elaýas Disneý amerikaly multiplikator, prodýuser we režissýor. Ol Mikki-Mausy we beýleki onlarça multiplikasion gahrymanlary döretdi, 650-den gowrak filme prodýuserlik etdi, 120 multfilmiň režissýory boldy, The Walt Disney Company studiýasyny esaslandyrdy.
Bu gün The Walt Disney Company iň iri media toparlaryň biridir. Onuň düzümine birnäçe kinostudiýa, çagalar üçin teleýaýlymlar, radio ýaýlymlary, seýilgähler toplumy, şypahanalardyr garbanyşhanalar girýär.