17 21-nji aprelde Türkiýe Respublikasynyň Ankara şäherinde Pähim-paýhas ummany Magtymguly Pyragy ýyly we beýik türkmen şahyrynyň doglan gününiň 300 ýyllygy mynasybetli ýurdumyzyň döredijilik wekiliýetiniň gatnaşmagynda medeni-köpçülik çäreleri geçirildi.
Ýurdumyzyň döredijilik wekiliýeti doganlyk ýurduň paýtagtyna saparynyň ilkinji gününde Türkiýäniň Saz we şekillendiriş sungaty uniwersiteti bilen tanyşdylar. 19-njy aprelde ir säher bilen Ankara şäherindäki Türkmenistan medeni-dynç alyş seýilgähi baýramçylyk öwüşginlerine beslendi.
Seýilgähiň merkezinde ýerleşýän Gündogaryň beýik akyldary we nusgawy şahyry Magtymguly Pyragynyň ýadygärligine ter gül çemenleri goýuldy.TÜRKSOÝ-nyň ştab-kwartirasynda guralan ýurdumyzyň amaly-haşam sungaty eserleriniň sergisi-de köp adamly boldy.
Döwlet Baştutanymyzyň Änew müňýyllyklardan gözbaş alýan medeniýet atly çuňňur pähim-paýhasa ýugrulan kitabynyň tanyşdyrylyş dabarasynda dünýä siwilizasiýasynyň ilkinji ojaklarynyň biri hasaplanýan gadymy topragyň aýratynlyklary, onuň öwrenilişi, ylymdaky orny barada giňişleýin söhbet edildi.
TÜRKSOÝ, Türkmenistanyň Türkiýe Respublikasyndaky ilçihanasy, ýurdumyzyň Medeniýet hem-de doganlyk döwletiň Medeniýet we syýahatçylyk ministrlikleri tarapyndan bilelikde guralan Türki dünýäniň beýik akyldar şahyry Magtymguly Pyragy atly konsertde türkmen sungatynyň parlak ýyldyzlary türkiýeli muşdaklara Magtymguly Pyragynyň şygyrlaryna döredilen aýdym-sazlardan, folklor eserlerinden ybarat çykyşlar çemenini sowgat etdi.