Prezidentiň ýanyndaky Kommunikasiýalar edarasy tarapyndan paýtagt Ankarada geçirlen Türki döwletleriň Dezinformasiýa garşy göreş forumynda agza ýurtlaryň arasynda maglumat howpsuzlygyny üpjün etmek we manipulýasiýa kampaniýalaryna garşy berk tutumyň alnyp barylmagyna üns çekildi.
Foruma Azerbaýjandan, Gazagystandan, Gyrgyzstandan, Özbegistandan we DKTR-dan ministrleriň orunbasarlary, köpçülikleýin habar beriş serişdeleriniň ýolbaşçylary, ylmy işgärler we žurnalistler gatnaşdy.
Forum Türki döwletleriň arasynda täsirli aragatnaşyk platformasyny döretmegi, tejribe alyşmagy we dezinformasiýa garşy göreşde hyzmatdaşlyk edilmegini maksat edinýär.
Aragatnaşyk pudagy boýunça edilýän hyzmatdaşlygy güýçlendireris
Forumyň açylyş dabarasynda çykyş eden Kommunikasiýalar edarasynyň başlygy Burhanettin Duran dezinformasiýanyň diňe bir maglumatyň galplaşdyrylmagy däl, eýsem şol bir wagtda milli howpsuzlygy we sosial durnuklylygy nyşana alýan strategik howpdygyny nygtady.
“Aragatnaşyk pudagy boýunça edilýän hyzmatdaşlygy güýçlendireris” diýen Duran, Türki döwletleriň guramasynyň “dilde, pikirde, işde birlik” şygaryna laýyklykda hereket etmelidigini belledi.
Duran dezinformasiýa garşy göreşiň “Türk dünýäsiniň 2040 strategiýasynda” hem-de 2025 Informasiýa boýunça iş meýilnamasynda ýer almagynyň bu meseläniň nähili möhümdigini görkezýändigini belledi.
Hakykata abanýan global howp
Dezinformasiýasynyň halkara gurala öwrülendigini nygtan Kommunikasiýalar edarasynyň başlygy Duran, esasan energetika, goranyş we aragatnaşyk ýaly strategik taslamalara garşy bilkastlaýyn ýagdaýda alnyp barylýan garalama kampaniýalaryna ünsi çekdi.
Duran İkinji Garabag urşy ýyllarynda Azerbaýjana garşy alnyp barylan kampaniýalara ünsi çekdi.
Azerbaýjanyň Media Galkynyş gullugynyň başlygy Ahmet Ismailow bolsa dezinformasiýasynyň umumy meseledigini aýratyn belledi.