Ýewraziýa Ykdysady Komissiýasynyň (ÝYK) Energetika we infrastruktura ministri Arzybek Kožoşew bilen Birleşen Arap Emirlikleriniň (BAE) Russiýadaky ilçisi Mohammad Ahmad Al-Jaberiň arasynda penşenbe güni duşuşyk geçirildi. Duşuşygyň dowamynda Ýewraziýa Ykdysady Birleşmesiniň (ÝYB) agza ýurtlary bilen BAE-niň arasyndaky ulag aragatnaşygy, şol sanda Türkmenistanyň üsti bilen demir ýol arkaly ýük daşamalary ara alnyp maslahatlaşyly.
Ýewraziýa Ykdysady Komissiýasynyň penşenbe güni habar bermegine görä, taraplar Demirgazyk-Günorta halkara ulag geçelgesini ösdürmegiň we energiýanyň alternatiw çeşmelerini ornaşdyrmagyň çäginde ÝYB-nyň agza ýurtlary bilen BAE-niň arasyndaky hyzmatdaşlyk meselelerine garadylar.
Arzybek Kožoşew ÝYB ýurtlaryndan harytlaryň Türkmenistanyň we Eýranyň üsti bilen demir ýol arkaly, soňra deňiz ýoly arkaly BAE-ne we yzyna daşalmagyny giňeltmek üçin mümkinçilikleriň öwrenilýändigini aýtdy.
Şeýle hem Ýewraziýa Ykdysady Komissiýasynyň Energetika we infrastruktura ministri ÝYB ýurtlarynyň “Ýewraziýa agroekspresi” atly bilelikdäki taslamasynyň çäginde bäş ýurduň azyk önümleriniň BAE-e daşalmagyny artdyrmak mümkinçiliklerine aýratyn üns berilýändigini belledi.
Mohammad Ahmad Al-Jaber BAE-nyň ulag we energetika pudagynda ÝYB bilen gepleşikleri geçirmäge taýýardygyny, şeýle hem Birleşen Arap Emirlikleri bilen ÝYB-nyň arasynda ykdysady hyzmatdaşlyk boýunça ylalaşygyň ýakyn wagtda baglaşylmagyna gyzyklanma bildirilýändigini mälim etdi.
Türkmenistan şu ýylyň aprel aýynda Ýewraziýa Ykdysady Birleşmesiniň agza ýurtlarynyň “Ýewraziýa agroekspresi” atly taslamasyna goşuldy.