12-nji dekabrda Türkmenistanyň Prezidenti Gurbanguly Berdimuhamedowyň gatnaşmagynda ýurdumyzyň baky Bitaraplygynyň 26 ýyllyk dabaralarynyň çäklerinde baýramçylyk kabul edişligi geçirildi. Ol Çandybil şaýolunyň ugrunda ýerleşýän Türkmenistanyň Kabul ediş merkezinde guraldy.
Dabara Türkmenistanyň Milli Geňeşiniň Mejlisiniň Başlygy, Ministrler Kabinetiniň Başlygynyň orunbasarlary, harby we hukuk goraýjy edaralaryň ýolbaşçylary, ministrlikleriň we pudaklaýyn dolandyryş edaralarynyň ýolbaşçylary, ýurdumyzda işleýän daşary ýurtly ilçiler, Türkmenistanyň daşary ýurtlardaky diplomatik wekilhanalarynyň ýolbaşçylary we beýleki myhmanlar çagyryldy.
Parahatçylyk we ynanyşmak forumyna gatnaşmak maksady bilen Türkmenistana gelen Ykdysady Hyzmatdaşlyk Guramasynyň Baş sekretary Husraw Noziri, Türki Döwletleriň Guramasynyň Baş sekretary Bagdad Amreýew, Türki medeniýetiň halkara guramasynyň (TÜRKSOÝ) Baş sekretary Dýusen Kaseinow, Ýewropa Bileleşiginiň Merkezi Aziýa boýunça Ýörite wekili Teri Hakala dagy hem kabul edişligiň hormatly myhmanlary boldular.
Çäräniň dowamynda Türkmenistanyň Prezidenti Gurbanguly Berdimuhamedow çykyş etdi we dabara gatnaşyjylary öz täze ýazan goşgusy bilen gutlady.
Kabul edişlikde ýurdumyzyň sungat ussatlarynyň konserti boldy, olar dürli dillerdäki aýdymlary ýerine ýetirdiler. Baýramçylyk şowhunyna daşary ýurtly myhmanlar hem goşuldylar we Halkara Bitaraplyk güni mynasybetli gutlag sözlerini beýan etdiler.