Türkmenistanyň häzirki we öňki prezidentleriniň ata-baba dogduk etraby bolan Gökdepä döwlet derejesinde üns berilýändigini, onuň ýurduň beýleki etraplaryndan tapawutlanýandygyny, oňa giren badyňa synlasa bolýar diýip, Azatlyk Radiosynyň habarçysy 23-nji oktýabrda beren maglumatynda aýdýar.
“Etrap merkeziniň we obalaryň bir kemsiz asfaltlanan köçeleri, ýaldyrap duran ýaşaýyş we durmuş maksatly jaýlar, dükanlardaky we bazarlardaky azyk bolçulygy, ýollardaky aglabasy täze awtoulaglar hem muňa şaýatlyk edýär” diýip, ýakynda etraba aýlanyp gören habarçymyz gürrüň berýär.
Köçeleriň arassaçylygy hem beýleki etraplardan tapawutlanýar. Şeýle-de, sebitden beýleki etraplara, şäherlere jemgyýetçilik transport serişdeleri, şol sanda awtobuslar ýygy-ýygydan gatnaýar.
“Ilatyň geýim-gejimleri we olaryň sürýän awtoulaglary hem etrap ýaşaýjylarynyň hal-ýagdaýynyň gowudygyndan habar berýär” diýip, habarçymyz aýtdy.
Bazarlarda, dükanlarda, hat-da köçelerde azygyň dürli görnüşleri arzan bahadan satylýar. Mysal üçin, döwlet dükanlarynda 1 litr günebakar ýagyny 17-18 manatdan näçe isleseň satyn alyp bolýar. Beýleki etrapdyr şäherlerde onuň bahasy, hiline görä, 19-30 manat aralygynda üýtgeýär.
“Köçelerde söwda edýän satyjylardan başga-da, sebitiň un-çörek kärhanasy tarapyndan öndürilen önümler hem ýörite ulaglarda satylýar. Bazarlaryň töwereginde, adamlaryň üýşýän ýerlerinde dilegçiler hem ýok” diýip, habarçymyz aýtdy.
Azatlygyň dürli sebitlerindäki habarçylary ýurduň etraplarynda we etrap merkezlerinde onlarça ýyl bäri düýpli abatlanmaýan sowet ýyllarynda gurlan köçeleriň, mekdepleriň, çagalar baglarynyň, lukmançylyk merkezleriniň bardygyny yzygiderli habar berýärler. Türkmenistanlylar bularyň döredýän oňaýsyzlyklaryndan ýyllarboýy şikaýat edip gelýärler.
Mundan başga-da, habarçylarymyz ýurduň beýleki sebitlerinde, şol sanda etrapdyr obalarynda azyk ýeter-ýetmezçiligi we gymmatçylygy, güzeran eklenji agyr bolan maşgalalar, zibil dörmäge ýa-da dilegçilik etmäge mejbur bolýan raýatlar barada hem ýygy-ýygydan habar berýärler.
Ýagdaýlardan habarly ýerli synçynyň we etrabyň döwlet edaralarynyň birinde işleýän ynamdar çeşmämiziň habarçymyza aýtmagyna görä, etraba döwlet derejesinde üns berilmeginiň sebäbi ýurtda prezidentden başlap, täsirli döwlet emeldarlaryň aglabasynyň şu sebitden bolmagy bilen baglanyşykly.
“Berdimuhammedowlar döwlet başyna geçensoň, döwletiň ýolbaşçy we gözegçilik ugurlary boýunça ýokary wezipelerine esasan gelip çykyşy boýunça Gökdepe we Bäherden etrabynyň oturymly teke taýpasyndan bolan türkmenler bellenilip başlandy. Bu bolsa etraba ünsüň artmagyna, ilatynyň hal-ýagdaýynyň gowulanmagyna getirdi. Häzir Gökdepedäki 10 hojalykdan dokusynyň ýokary wezipede işleýän dogan-garyndaşy bar. Muny bilmeýän adam tas ýok” diýip, ynamdar çeşmämiz aýtdy.
Azatlyk ýokarda beýan edilen ýagdaýlar barada sebitiň ýolbaşçylaryndan, şol sanda etrap häkimliginden kommentariý alyp bilmedi.
Ahal welaýatynyň Gökdepe etraby prezident Serdar Berdimuhamedowyň we onuň kakasy, öňki prezident, häzir Halk maslahatynyň başlygy Gurbanguly Berdimuhamedowyň ata-baba dogduk sebitidir.
Soňky ýyllarda Türkmenistanyň 40-dan gowrak we Ahalyň ýedi etrabyndan biri bolan Gökdepede ýaşaýyş we durmuş maksatly täze desgalaryň, şol sanda çagalar baglarynyň, mekdepleriň, lukmançylyk merkezleriniň onlarçasy guruldy.
G.Berdimuhamedow bu desgalaryň birnäçesine ozal ady eşidilmedik atasynyň adyny daky, onuň adyny ebedileşdirmekde hem ep-esli iş etdi.
2020-nji ýylyň güýzünde G.Berdimuhamedow atasy Berdimuhamet Annaýewiň doglan obasynda, Gökdepäniň Yzgant obasynda Ýokanç keseller hassahanasyny açdy.
Şeýle-de, Gökdepä 2019-njy ýylda ýurduň “iň ýokary netije gazanan etraby” diýlip kesgitlenmegi mynasybetli, 1 million dollar möçberinde pul baýragy berildi.
Mundan başga-da, Gökdepe etrabynyň Babarap geneşliginiň golaýynda, Köpetdagyň eteginde 5 milliard dollarlyk Arkadag şäheri guruldy. Onuň birinji tapgyry şu ýylyň iýun aýynda açyldy.
Türkmenistanyň berk döwlet gözegçiligindäki mediasy bu ýagdaýlary giňden beýan etse-de, ýurduň sebitlerinde ilatyň ýüzbe-ýüz bolýan problemalary barada hiç hili mesele gozgamaýar.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.