Oskaryň buşlukçysy hasaplanýan “Altyn globus” baýraklary gowşuryldy. 78-nji Altyn globus baýraklarynyň gowşurylyş ýa-da ýeňijileriniň mälim ediliş dabarasy Los Anjelesde hem-de Nýu Ýorkda geçirildi. Dabarany meşhur aktrisalar Emi Pouler (Los Anjeles) bilen Tina Feý (Nýu Ýork) alyp bardylar.
Dabarada iň gowy drama filmi diýlip “Çarwadarlaryň mekany” (Nomadland) saýlandy. Filmi surata düşüren hytaýly zenan Hloe Çžao iň gowy režissýor baýragy bilen sylaglandy. Ol “Altyn globusda” iň gowy režissýor saýlanan ikinji zenan, ilkinji aziýaly hökmünde taryha girdi.
Drama filmleriniň iň gowy aktýory awgust aýynda aradan çykan Çedwik Bouzman (Ma Rainey’s Black Bottom), iň gowy aktrisasy-da Andra Deý (The United States vs. Billie Holiday) saýlandy.
Iň gowy komediýa filmi hökmünde-de “Borat 2” (Borat Subsequent Moviefilm) filmi baýraga mynasyp boldy. Filmiň baş keşbinde surata düşen Saşa Baron Kohen komediýa/mýuzikal filmleriniň iň gowy aktýory baýragyna laýyk görüldi. Komediýa ýa-da mýuzikal filmleriniň iň gowy aktrisa baýragy-da Rosamund Paýka (I Care a Lot) gowşuryldy.
Daniel Kaluuýa (Judas and the Black Messiah) ikinji plandaky iň gowy aktýor, Judi Foster (The Mauritanian) bolsa ikinji plandaky iň gowy aktrisa baýraklaryna laýyk görüldi. “Çikagoly 7-leriň sud işi” (The Trial of the Chicago 7) filminiň edebi esasyny ýazan Aaron Sorkin iň gowy ssenariý baýragy bilen sylaglandy.
Iň gowy animasiýa saýlanan “Ruh” (Soul) multfilmindäki sazlar (kompozitorlar – Trent Reznor, Attikus Ross, Jon Batiste) iň gowy saz baýragyna mynasyp boldy. “The Life Ahead” filmindäki “Io si (Seen)” atly aýdym iň gowy aýdym diýlip saýlandy. “Minari” kinosy-da daşary ýurt dilindäki iň gowy film baýragyna laýyk görüldi.
The post “Çarwadarlaryň mekany” iň gowy drama, “Borat 2” iň gowy komediýa appeared first on Zaman Türkmenistan.