Futbolyň watany 55 ýyldan soň finalda
Ýarym finalyň beýleki duşuşygy-da köpleriň garaşyşy ýaly geçdi.Wembley-de oýnalan Angliýa-Daniýa duşuşygynda ýeňiş iňlisleriň tarapynda boldy. Çekeleşikli geçen oýunda Angliýanyň ýygyndysy çempionatyň sýurpriz toparyny goşmaça wagtda 2-1 hasabynda ýeňmegi başardy.
Oýnuň 30-njy minutda Mikkel Damsgor jerime urgusyndan owadan gol bilen daniýalylary öňe saýlady.Iňlisleriň bu gola jogaby gijikmedi. 39-njy minutda Sakanyň sag gyradan jerime meýdançasynyň içine gönükdiren topuny Simon Kýer Rahim Sterlingden öňürti ýalňyşlyk bilen öz derwezesinden girizdi.
Ikinji ýarymda-da oýnuň kontrollygy iňlislerde bolup, daniýalylar wagtal-wagtal garşylyklaýyn hüjümler guradylar.Netijede, oýnuň esasy wagty 1-1 deňlikde tamamlandy.Goşmaça wagtyň 104-nji minutynda emin azda-kände jedelli pursatda iňlisleriň peýdasyna penalti urgusyny belledi.
Harri Keýniň urgusyny derwezeçi Kasper Şmeýhel birinji gezek gezek sowsa-da, ýyldyz hüjümçi yzyna gaýdan topy derwezä gönükdirdi. Şeýlelikde, futbolyň watany Angliýa taryhynda ilkinji gezek yklym ýaryşynyň finalynda oýnamaga hukuk gazandy.
Angliýanyň ýygyndysy Ýewropa çempionatynda finala çykan 13-nji topar hökmünde hasaba alyndy.Mundan öňki 12 toparyň 10-sy çempionlyk gazanypdy.Mundan öň finala çykybam diňe ozalky Ýugoslawiýa bilen Belgiýanyň ýygyndylary kubogy alyp bilmändiler.
Bu olaryň uly ýaryşlardaky 2-nji finaly bolar.Angliýanyň ýygyndysy mundan 55 ýyl ozal, 1966-njy ýyldaky Dünýä Kubogynda ýeňiş gazanypdylar.Angliýanyň ýygyndysy finalda Italiýa bilen duşuşar.
4-nji gezek ýarym finalda oýnan Daniýanyň ýygyndysy 3-nji gezek ýeňlişe sezewar boldy.
Harri Keýniň geçiren goly iňlisleriň ÝÇ-däki 50-nji goly boldy. Şeýle-de Keýn uly ýaryşlardaky 10-njy goluny geçirip, bu ugurda Gari Linekeriň rekordyny gaýtalady.
1992-nji ýyldan bäri ilkinji gezek ýarym finalyň iki oýnunda esasy wagtda gol geçirildi. ÝÇ-de 5-nji gezek ýarym finalyň ýeňijileriniň ikisi-de goşmaça wagtda kesgitlenildi (1976, 1984, 1996, 2000).