Gazagystan 1 milliard kub metr töweregi süýşgün suwy ýurduň Atyrau oblastynyň suw hojalygy edarasynyň dört kanaly arkaly Hazara akdyrdy diýip, ýurduň Suw gorlary we irrigasiýa ministrliginiň resmi wekili Moldir Abdualiýewe salgylanýan Kazinform habar berdi.
Gazagystanyň suw hojalygy hünärmenleri şeýle hem suwy ýurtdaky Balgaş kölüne akdyrýarlar, köl Kapşagaýa suw howdanyndan akdyrylan 2,5 mlrd kub metre golaý suw bilen doldy.
Habarda ýurtdaky we goňşy Russiýadaky suw süýşgünleriniň hasabyna birnäçe suw howdanlarynyň hem-de kölleriň doldurylýandygy bellenýär. Olardan, mysal üçin, Günbatar-Gazagystan oblastyndaky Kamyş-Samar kölüne 20 ýylda suw barmandyr. Oblastda soňky ýyllarda guramak howpy abanan Ýedilsor, Žaltyrgol, Birkazan, Sorkol köllerine suw akdyrmak işlerine girişilendigi habar berilýär.