Birleşen Arap Emirlikleri Şanhaý Hyzmatdaşlyk Guramasynyň (ŞHG) gepleşik boýunça hyzmatdaşy derejesine eýe boldy. Bu barada BAE-niň habar gullugy habar berdi.
Onuň maglumatlaryna görä, guramanyň daşary işler ministrleriniň 4-5-nji maýda Hindistanda bolup geçen duşuşygynyň çäklerinde BAE-niň gepleşik boýunça hyzmatdaşy hökmünde birleşigiň işine gatnaşmagyny göz öňünde tutýan özara düşünişmek baradaky memoranduma gol çekildi.
Bu resminama ŞHG-niň Baş sekretary Çžan Min we BAE-niň Hindistandaky ilçisi Abdel Naser al-Şaali gol çekdi.Agentligiň belleýşi ýaly, gepleşik boýunça hyzmatdaş derejesiniň berilmegi “BAE-niň beýleki ýurtlar we halkara guramalar bilen deňagramly hyzmatdaşlygy saklamak we ösdürmek ugrundaky yzygiderli tagallalaryny görkezýär”.
BAE-niň daşary işler ministri Şeýh Abdalla ben Zaýid Al Nahaýan “umumy maksatlara ýetmek üçin ýurtlaryň arasyndaky hyzmatdaşlygy güýçlendirmekde şeýle birleşikleriň aýratyn ähmiýetini” belläp geçip, ŞHG-niň Ýewraziýadaky syýasy durnuklylygy we ykdysady ösüşi üpjün etmekdäki ähmiýetine ünsi çekdi. “Öňümizdäki döwürde BAE ŞHG-niň işine işjeň gatnaşmaga we agza döwletler bilen gatnaşygy berkitmäge çalyşar.
Biz global täsiri we ähmiýeti artýan guramanyň hyzmatdaşy bolmakdan hoşal” diýip, agentlik ministriň sözlerine salgylandy.
ŞHG-ä agza ýurtlaryň daşary işler ministrleriniň geňeşiniň mejlisi 4-5-nji maýda bu gurama ýolbaşçylyk edýän Hindistanyň günortasyndaky Goa ştatynyň paýtagty – Panaji şäherinde geçirildi.
ŞHG-ni döretmek baradaky jarnama 2001-nji ýylyň iýun aýynda Şanhaýda alty döwlet – Russiýa, Gazagystan, Gyrgyzystan, Hytaý, Täjigistan we Özbegistan gol çekdi.Häzirki wagtda bu gurama Hindistan we Pakistan hem girýär.
Synçy döwletler – Owganystan, Belarus, Eýran we Mongoliýa, gepleşik boýunça hyzmatdaşlary – Azerbaýjan, Ermenistan, Kamboja, Nepal, Türkiýe we Şri-Lanka. ŞHG-niň 2021-nji ýylyň sentýabr aýynda Duşanbe şäherinde geçirilen sammitinde Eýrany bu gurama kabul etmegiň tertibi başlandy. Şu ýyl Belarus ŞHG-ä doly agza bolmak üçin resmi taýdan ýüz tutdy.