Russiýalylar özlerini has-da buýsandyrýan rus edebiýatynyň nusgawy ýazyjy-şahyrlarynyň atlaryny mälim etdiler. Sanawyň başyny Aleksandr Puşkin, Mihail Bulgakow we Fýodor Dostoýewskiý çekdi. Bu barada “Litres” kitap hyzmatlary kompaniýasy mälim etdi.
“Litres” kitap hyzmatlary kompaniýasynyň internet ulanyjylaryň arasynda geçiren pikir soralyşygynda olaryň Russiýanyň haýsy ýazyjy-şahyrlaryna buýsanýandygy ýüze çykaryldy. Sanawyň lideri Aleksandr Puşkin bolup, (78%) ikinji orny Mihail Bulgakow (68%) eýeledi. Üçünji orny Fýodor Dostoýewskiý (64%) eýeledi” diýlip beýanatda bellenilýär.
Şeýle hem sanawyň ilkinji bäşligine Anton Çehow girdi. Pikir soralyşyga gatnaşanlaryň 62%-i Anton Çehowa, 61%-i bolsa, Lew Tolstoýa ses berdiler. Russiýalylaryň iň buýsanýan iň gowy 10 nusgawy ýazyjy-şahyrlarynyň sanawyna Sergeý Ýesenin (59%), Nikolaý Gogol (57%), Mihail Lermontow (56%) we Anna Ahmatowa (50%) we Korneý Çukowskiý (46%) girdi.
-Okyjylar birinji orny Aleksandr Sergeýewiçe berdiler. Çagalykdan ýüregimizde orun beren bu awtorumyzyň goşgularynyň köpüsini her birimiz ýatdan bilýäris. Gyzykly ýeri, top-10-a Marina Swetaýewa däl-de Anna Ahmatowa girdi, şeýle hem iň meşhur rus dramaturgy Aleksandr Ostrowskiý sanawda ýok, ýöne okyjylarymyz Korneý Çukowskini unutmadylar diýip, “Litres” kompaniýalar toparynyň baş redaktory Ýekaterina Pisarewa aýtdy.
Pikir soralyşygyň netijelerine görä, okyjylaryň 96%-i rus edebiýatynyň nusgawy ýazyjy-şahyrlaryna buýsanýar, 90%-i bolsa nusgawy eserleriň häzirki wagtda hem aýratyn ähmiýetiniň bardygyny belläp geçdi. Mundan başga-da, pikir soralyşyga gatnaşanlaryň 66%-i olaryň kitaplarynyň Russiýanyň taryhyna öwrenmäge, 59%-i bolsa olar arkaly rus halkynyň ruhy dünýäsi bilen tanyşmaga mümkinçilik berýändigine ynanýarlar.