Ysraýylyň Liwana guran soňky hüjümlerine gaýtawul görkezen Hizbullah, Ysraýylyň demirgazygyna raketa hüjümini gurandygyny mälim etdi.
Gurama tarapyndan penşenbe güni ir ertir berlen beýannamada, Ysraýylyň ylalaşygy bozandygy sebäpli Manara etrabyna raketa hüjüminiň guralandygy nygtaldy.
Hizbullah tarapyndan berlen beýannamada “ABŞ bilen Ysraýylyň ýurdumyza we halkymyza guraýan hüjümleri bes edilýänçä degişli gaýtawuly görkezmäge dowam ederis” diýildi.
“Ýediot Ahronot” gazeti, 9 sagat dowam eden asudalykdan soň Liwandan Ysraýylyň demirgazygyna atylan raketanyň öňüniň alynandygyny mälim edipdi.
Ysraýylyň hüjümleri dowam edýär
Bu wakalar, ABŞ bilen Eýranyň, Waşington bilen Tel-Awiwiň 28-nji fewralda Tährana garşy başladan söweşiniň iki hepde möhlet bilen bes edilmegi boýunça ylalaşyk gazanylandygynyň yglan edilmeginden 1 gün soň başdan geçirildi.
Ysraýyl Eýran bilen gazanylan iki hepdelik ylalaşyga goldaw berýändigini mälim edipdi, emma eýranly we pakistanly resmileriň beren beýannamalarynyň tersine ylalaşygyň Liwany öz içine almaýandygyna ünsi çekdi.
Ysraýylyň harby goşuny çarşenbe güni Liwana guran giň gerimli howa hüjümlerinde azyndan 254 adamy öldürdi we 1165 adamy ýaralady.
Ysraýylyň 2-nji martdan bäri Liwana guraýan hüjümlerinde 1530-dan gowrak adam ýogaldy.