Awstraliýanyň Brisben şäherinde geçirilen boks şüweleňinde taryhy tutluşyk boldy. 55 müň tomaşaçynyň şaýatlygynda geçen şüweleňiň dowamynda 8 ugurdan dünýä çempionlygy bolan ýeke-täk boksçy, filippinli Menni Pakýao bilen awstraliýaly Jeff Horn duşuşdy. 12 raundlap dowam eden tutluşykda 2 boksçy hem erjellik görkezdi.
Wagtal-wagtal Pakýao şowly urgular etse-de, duşuşygyň dowamynda has netijeli urgulary geçiren ýer eýesi Horn boldy.Netijede, eminler 29 ýaşyndaky Jeff Hornuň güýçli garşydaşyndan üstün çykandygyny biragyzdan makullap, awstraliýaly türgeni ýeňiji diýip, yglan etdiler (117:111, 115:113, 115:113). Şunlukda, 38 ýaşly Pakýao karýerasy boýunça 7-nji ýola ýeňlişe sezewar boldy.
Ol häzire çenli 39-sy nokaut bilen jemi 59 gezek ýeňiş gazandy. 67 tutluşyk geçiren Pakýaonyň 2 duşuşygy-da deňlikde tamamlandy. Öz dogduk şäherinde dünýä belli boksçyny ýeňendigine buýsanýan Horn şu wagta çenli 18 tutluşygynyň 17-sinde garşydaşlaryndan rüstem geldi. Şol ýeňişleriň 11-sini nokaut bilen gazanan Hornuň 1 duşuşygy-da deňme-deň netijelendi.