Türkmenistanyň Oguzhan adyndaky Inžener-tehnologiýalar uniwersiteti bilen Aşgabat şäherindäki daşary ýurt dillerini, takyk, tebigy dersleri çuňlaşdyryp öwredýän umumybilim berýän ýöriteleşdirilen 140-njy orta mekdebiniň bilelikde guramagynda ekologiki çäre geçirildi. Ýurduň geljegi bolan ýaş nesliň ekologik bilimini, edep-terbiýesini, ekologik medeniýetini has-da ýokarlandyrmak maksady bilen geçirilen çärä mekdebiň ýokary synp okuwçylary gatnaşdylar.
Dabaraly çäräniň dowamynda Türkmenistanyň Oguzhan adyndaky Inžener-tehnologiýalar uniwersitetiň Ekologiýa we tebigatdan peýdalanmak hem-de Mikrobiologiýa taýýarlygy ugurlarynyň talyplarynyň gatnaşmagynda dürli oýunlar, goşgular, aýdymlar arkaly okuwçylara ösümlik we haýwanat dünýäsi, olaryň ýaşaýyş aýratynlyklary, tebigaty gorap saklamagyň ähmiýeti barada giňişleýin maglumatlar berildi. Şeýle-de, okuwçylara dürli otag ösümliklerine we öý haýwanlaryna ideg etmek, plastik galyndylaryny hojalyk maksatlary üçin gaýtadan peýdalanmak boýunça amaly endikler öwredildi.
Ýeri gelende bellesek, Türkmenistanyň Oguzhan adyndaky Inžener-tehnologiýalar uniwersitetiniň talyplary döwlet we halkara derejesinde ekologiýa meseleleri boýunça geçirilýän dürli çärelere, bäsleşiklere işjeň gatnaşýar.