Angliýaly 13 ýaşly mekdep okuwçysy sport köwüşlerini öndürýän Nike kompaniýasy bilen geleşik baglaşdy diýip, Gazeta.ru ýazýar. Kompaniýanyň wekillerine onuň sapak wagty çekýän suratlary ýarady.
Geleşigiň şertleri boýunça Jo Ueýl sport aýakgaplarynyň käbir görnüşleri üçin bezeg suratlaryny çeker. Ol öň çeken suratlaryny sosial ulgamda ýerleşdirendigi üçin mugallymlaryň käýinjini alypdyr.
Jonuň kakasy Gregori Ueýl öz oglunyň bu üstünligine guwanýandygyny, onuň zehinine şeýle meşhur kompaniýa tarapyndan hormat goýulýandygyna begenýändigini gürrüň berdi.
Jo özüniň söýgüli gahrymanlarynyň başga planetalylardygyny we nahar görnüşleridigini aýdýar. Ol şeýle-de tebigatda görýän zatlarynyň suratyny çekmegi halaýandygyny sözüniň üstüni goşdy.