Futbol boýunça Italiýanyň çempionaty “Serie A”-da çempionlyk ýaryşynyň ýeňijisi soňky tapgyrda belli bolar.Sanawyň lideri “Milan” öz meýdançasynda “Atalantany” kabul etdi.Esasan hem 2-nji ýarymy çekeleşikli geçen oýunda “Milan” 2-0 ýeňiş gazandy. “Milana” ýeňiş getiren gollary toparyň çep gyraky futbolçylary Rafael Leao (56) bilen öz jerime meýdançasyndan alyp giden topuny derwezä gönükdiren Teo Hernandes (75) geçirdi. Şeýlelikde, “Serie A”-da 15 oýundan bäri ýeňilmän gelýän “Milan” (10 ýeňiş, 5 deňlik) utugyny 83-e çykardy. “Milandan” soň 2-nji ýerde barýan “Inter” hem myhmançylykda “Kaliari” bilen duşuşdy.
Oýunda “Inter” 3-1 hasabynda ýeňiş gazandy. “Interiň” gollaryny Darmian (25) bilen Lautara Martines (51, 84) öz atlaryna ýazdyrdylar.Bu ýeňişden soň “Inter” topary 2 utuklyk aratapawudy gorap, çempionlyk umydyny soňky tapgyra çenli saklamagy başardy. 38-nji tapgyrda “Milan” myhmançylykda “Sassuolo” bilen, “Inter” bolsa öz meýdançasyna “Sampdoriýa” bilen duşuşar. “Milana” çempionlyk üçin bir utuk hem ýeterlik bolar.