Türkmenistanyň prezidenti Gurbanguly Berdimuhamedow 30-njy maýda Guwanç Baýramdurdyýewi döwlet teledideniýesiniň “Miras” telekanalynyň direktory wezipesine belledi.
Ýatladýarys, döwlet baştutany türkmen medeniýeti barada gepleşik berýän telekanalyň ozalky ýolbaşçysy Bäşim Ataýewi 7-nji maýda, “işde goýberen kemçilikleri üçin” wezipesinden boşatdy. Şonda telekanalyň wagtlaýyn ýolbaşçylygyna baş redaktor Kuwwatberdi Hezziýew bellenildi.
Prezident şondan birnäçe gün soňra medeniýet boýunça wise-premýer Bahargül Abdyýewa “gözegçilik edýän ulgamynyň ýolbaşçylarynyň işlerine gözegçiligi gowşadandygyny” aýdyp, “ýolbaşçylaryň birnäçesiniň garamagyndaky düzümlerde düzgün-tertibiň köp bozulýandygy, dürli ýaramaz ýagdaýlara ýol berilýändigi üçin” käýinç berdi.