ABŞ-nyň prezidenti Donald Tramp ýekşenbe güni Eýranyň resmileriniň ýurduň ýadro programmasy boýunça mümkin bolan gepleşikleri ara alyp maslahatlaşmak üçin ABŞ bilen aragatnaşyga geçendiklerini we diplomatik başlangyçlara gatnaşmaga isleg bildirýändiklerini aýtdy.
Tramp Floridadan Waşingtona barýarka “Air Force One” uçarynda žurnalistlere beren interwýusynda Eýranyň resmileriniň şenbe güni onuň bilen aragatnaşyga geçip, gepleşikler geçirmegi talap edendiklerini habar berdi.
“Olar düýn jaň etdiler. Eýran düýn gepleşikler geçirmek üçin jaň etdi” diýip aýdan Tramp: “Meniň pikirimçe olar ABŞ tarapyndan çüňke gysylmakdan ýadadylar. Eýran gepleşikler geçirmek isleýär” diýdi.
Tramp duşuşyk üçin taýýarlyklaryň alnyp barylýandygyny aýtdy, ýöne ol ýerde bolup geçýän wakalaryň ABŞ-ny islendik gepleşikleriň geçirilmeginden öň herekete geçmäge mejbur edip biljekdigi barada duýduryş berdi.
Eýranda dekabr aýynyň ahyryndan bäri milli walýutanyň birden pese gaçmagy we ykdysady ýagdaýlaryň ýaramazlaşmagy sebäpli protestler dowam edýär.
Tramp mundan ozal Eýrandaky ýagdaýy ýakyndan gözegçilik edýändiklerini we protestlerde ölenleriň sanynyň artmaga dowam eden halatynda "örän kyn ýollary" göz öňünde tutjakdyklaryny aýdypdy.