“Hürriýet” gazeti, “Nemes gazetiniň Türkiýe analizi” söz başyly habarynda, dünýäde birnäçe ýurda eksport edilen, söweşde we asuda durmuşda uly jogapkärçilik alyp bilýän türk ýaragly we ýaragsyz uçarmansyz howa ulaglary hakyndaky habarlar Germaniýanyň köpçülikleýin habar beriş serişdelerinde uly seslenme döredýändigini mälim edýär.
Germaniýanyň “Frankfurter Allgemeine” gazeti türk ýarag senagaty hakyndaky habarlara giňişleýin ýer berdi. “Türk harby goranyş senagaty uly üstünlik gazandy” diýen nemes gazeti, birnäçe ýurduň türk dronlaryny satyn almak isleýändigini ýazdy.
“Sabah” gazeti, “Moodys, türk banklarynyň balyny artdyrdy” söz başyly habarynda, Halkara kredit derejelendiriş guramasy Moodysiň, türk banklarynyň balyny negatiwden durnukla öwürendigini mälim edýär.
“Haber Türk” gazeti, “Mugla gelýän Polşaly syýahatçylaryň sany artýar” söz başyly habarynda, Türkiýäniň esasy syýahatçylyk merkezlerinden biri bolan Mugla welaýatyna 7 aýda gelen 1 million 779 müň 356 syýahatçynyň 120 müň 328-ni polşalylaryň emele getirendigini ýazýar.
“Ýeni Şafak” gazeti, “Sümela manastyrynda 10-njy gezek dini dabara geçirildi” söz başyly habarynda, Trabzon welaýatynyň Maçka etrabynda ýerleşýän Sümela manastyrynda, Fener grek patriarhy Bartolomeosyň ýolbaşçylyk etmeginde 10-njy gezek dini dabaranyň geçirlendigini habar berýär. Bartolomeos, 2010-njy ýyldan bäri manastyrda dini dabaralaryň geçirilmegine rugsat beren Prezident R. T. Erdogana we beýleki ýolbaşçylara sagbolsun aýtdy.
“Star” gazeti, “Galatasaraý 1- Olimpiaýa Lýublýana 0” söz başyly habarynda, UEFA Çempionlar ligasynyň 3-nji seçip alyş bäsleşiginde Galatasaraý futbol komandasynyň Sloweniýanyň wekili Olimpiaýa Lýublýana bilen duşuşyk geçirendigini ýazýar.
Galatasaraý duşuşykda bäsdeşini 1-0 hasabynda utup, plaý-offa gatnaşmaga hukuk gazandy.