“Sabah” gazeti “TBMM-niň Başlygy Kurtulmuşyň Gaza boýunça ýüzlenmesi” söz başyly habarynda, Türkiýäniň Beýik Millet Mejlisiniň Başlygy Numan Kurtulmuşyň düýn Bosniýa-Gersegowinada beren beýannamasynda Gazadaky gumanitar pajyga ünsi çekip; “Şu günki günde Gazadaky gyrgynçylygyň jogapkärleri hökmany suratda halkara kazyýetiň öňüne çykar, edenleriniň jezasyny çekerler. Bu gyrgynçylyga sesini çykarmaýanlaram, göz ýumýanlaram hasabat bererler” diýendigini ýazýar.
“Watan” gazeti “Daşary işler ministri Fidan ÝB-ne Gaza sebäpli reaksiýa bildirdi” söz başyly habarynda, Daşary işler ministri Hakan Fidanyň Germaniýada geçirilen “ÝB-niň Giňelme Özgertmesi” temasy bilen ministrleriň derejesinde guralan maslahatyň metbugata ýapyk bölüminde Gaza Sektorundaky gumanitar pajyga ünsi çekip; “ÝB-ne agza käbir ýurtlarda palestinalylar bilen arkalaşyk mitingleriniň geçirilmegine rugsat bermezlik iki standartlylykdyr” diýendigini mälim edýär.
“Star” gazeti “Ministr Koja: Gazada bejergi alýan palestinalylaryň Türkiýe getirilmegi üçin ähli goldawy bereris” söz başyly habarynda, Saglygy goraýyş ministri Fahrettin Kojanyň Ysraýylyň hüjümleri sebäpli işini bes etmeli bolman Gazadaky Türkiýe-Palestina Dostluk hassahanasyndaky rak kesellileriň bejergisiniň dowam etdirilmegi, Gazadaky beýleki çagalaryň we ulularyň reanimasiýada bejergi alýanlarynyň lukmançylyk taýdan ukyply bolanlarynyň Türkiýä getirilmegi üçin degişli goldawy bermäge taýýardyklaryny aýdandygyny ýazýar.
“Haber Türk” gazeti “1 hepdede 87 terrorçy täsirsiz ýagdaýa getirildi” söz başyly habarynda, Milli goranmak ministrliginiň Metbugat we jemgyýetçilik gatnaşyklardan jogapkär geňeşçisi admiral Zeki Aktürküň beren beýannamasyndda; “Yragyň we Siriýanyň demirgazygy bilen bilelikde soňky bir hepde-de 87 terrorçy täsirsiz ýagdaýa getirildi, şeýlelikde täsirsiz ýagdaýa getirilen terrorçylaryň sany ýylyň dowamynda 1802-ä, 2015-nji ýylyň 24-nji iýulyndan bäri bolsa 39,145-ä ýetdi” diýen sözlerini çap edýär.
“Hürriýet” gazeti “ABŞ-nyň döwlet Sekretary Entoni Blinken Türkiýa gelýär” söz başyly habarynda, ABŞ-nyň döwlet Sekretary Entoni Blinkeniň Türkiýä sapar etjekdigini ýazýar. Diplomatik çeşmelerden alynan maglumata görä ABŞ-nyň döwlet Sekretary 5-nji noýabrda Türkiýä sapar eder.