“Hürriýet” gazeti “Yragyň we Siriýanyň demirgazygynda soňky bir hepdede 36 terrorçy täsirsiz ýagdaýa getirildi” söz başyly habarynda, terrorizme garşy göreşiň egilşiksiz dowam etjekdigini beýan eden Milli goranmak ministrligi “Terrorçylar özlerine garaşýan soňdan halas bolup bilmezler, soňky bir hepdede Yragyň we Siriýanyň demirgazygynda 36 terrorçy täsirsiz ýagdaýa getirildi” diýip, habar berdi.
“Star” gazeti “MHG 200 kilometr alysda urdy” söz başyly habarynda, Milli howpsuzlyk guramasynyň Türkiýä garşy terror aksiýasyny guramagy meýilleşdirýändigi anyklanan PKK/KJK terrorçysy Sadyk Şeýh Ahmedi Türkiýe serhedine 200 kilometre barabar alyslykda ýerleşýän Yragyň Süleýmaniýe şäherinde täsirsiz ýagdaýa getirendigini ýazýar.
“Sabah” gazeti “Ministr Uralogly beýan etdi: Ýolagçy gatnatma ukyby 82 millione ýeteriler” söz başyly habarynda, Ulaglar we infrastruktura ministri Abdulkadir Uraloglunyň Antalýanyň dünýäniň esasy syýahatçylyk merkezlerinden biridigine ünsi çekip, Antalýanyň howa menzilini giňeldiş taslamasynyň çäginde ýolagçy gatnatma mümkinçiligini 35 milliondan 82 milliona ýetirmegi maksat edinýändiklerini aýdandygyny okyjy köpçüliginiň dykgatyna ýetirýär.
“Watan” gazeti “Kappadokiýada 4,8 million syýahatçy bilen rekord” söz başyly habarynda, Türkiýäniň esasy syýahatçylyk merkezlerinden biri bolan Kappadokiýa sebitine 2023-nji ýylda 4 million 826 müň 622 ýerli we daşary ýurtly syýahatçynyň gelendigini mälim edýär.
“Haber Türk” gazeti “Alperen Şengüniň üstünligi” söz başyly habarynda, NBA-da Hýuston Roketiň formasyny geýinen türk milli basketbolçysy Alperen Şengüniň ukyby bilen ünsleri özüne çekmäge dowam edýändigini ýazýar. Şu tapgyrda 32 bäsleşige çykan ýaş türgen komandasynda iň ýokarda durýan bolsa, NBA-de hem birnäçe bäsdeşinden öňde.