“Watan” gazeti “8 terrorçy täsirsiz ýagdaýa getirildi” söz başyly habarynda, terrorizme garşy göreşiň ýurduň içinde we serhetleriň daşynda egilşiksiz dowam edýändigini ýazýar. Milli goranmak ministrliginden berilen beýannamada “Penje-Gulp” operasiýa zolagynda 8 terrorçynyň täsirsiz tagdaýa getirilendigi habar berilýär.
“Sabah” gazeti “Putin: “İň ynamda hyzmatdaş Türkiýe” söz başyly habarynda, Russiýanyň Prezidenti Wladimir Putiniň Ýewropa berk reaksiýa bildirip, “Yzgiderli häsýetde Russiýanyň energiýa serişdelerini bermeýändigini, çäklendirýändigini aýtdylar. Biz hiç zady çäklendirmeýäris, ähli zady berýäris. İň ynamda hyzmatdaş bolsa Türkiýe boldy. İne, TürkAkym arkaly gaz akdyrylýar” diýen sözlerini çap edýär.
“Hürriýet” gazeti “Ministr Kajyr Saud Arabystanynyň Maýa goýum ministri bilen duşuşdy” söz başyly habarynda, Senagat we tehnologiýalar ministri Mehmet Fatih Kajyryň Saud Arabystanynyň Maýa goýum ministri Halid Al Falih bilen duşuşandygyny okyjy köpçüliginiň dykgatyna ýetirýär. Ministr Kajyr sosial media hasabyndan beren habarnamasynda duşuşykda iki ýurduň arasyndaky ykdysady gatnaşyklary hasam ösdürjek başlangyçlar hakynda pikir alyşandyklaryny beýan etdi.
“Star” gazeti “Türk howa giňişligine ýerli we milli mümkünçilikleri bilen gözegçilik ediler” söz başyly habarynda, Ulaglar we infrastruktura ministri Abdulkadir Uraloglunyň türk inženerleri tarapyndan öndürilen Türkiýäniň ilkinji ýerli we milli raýat gözegçilik radarlarynyň üstünlik bilen kabul edilip alnandygyny we Gaziantep howa menzilinde ulanmaga taýýardygyny mälim edendigini ýazýar.
“Haber Türk” gazeti “Medeniýet we syýahatçylyk ministri Ersoý: 2028-nji ýylda 100 milliard dollar maksadymyz bar” söz başyly habarynda, syýahatçylykda çägiň günsaýyn ýokarlaýandygyna ünsi çeken Medeniýet we syýahatçylyk ministri Mehmet Nuri Ersoýuň 2028-nji ýylda syýahatçylyk sanynda dünýäde ilkinji üçlükde orun alyp, 100 milliard dollar girdeji almagy maksat edinýändiklerini aýdandygyny okyjylar köpçüliginiň dykgatyna ýetirýär.