24-nji awgustda Türkmenistan Daşary işler ministrliginde Türkmenistan bilen Palestina Döwletiniň arasynda daşary syýasat edaralarynyň ýolbaşçylary derejesinde syýasy geňeşmeler geçirildi. Türkmen tarapyndan gepleşiklere Daşary işler ministri Raşid Meredow, Palestina tarapyndan, Palestina Döwletiniň Daşary işler we daşary ýurtlarda ýaşaýan Palestinalylaryň işi boýunça ministri Riýad Al-Maliki ýolbaşçylyk etdiler.
Geňeşmeleriň dowamynda ikitaraplaýyn gatnaşyklary giňeltmegiň häzirki ýagdaýy we syýasy, söwda-ykdysady, medeni-ynsanperwer we beýleki ugurlarda geljekki mümkinçilikleri seljerildi. Ministrler özara bähbitli hyzmatdaşlygyň netijeli ösüşini kanagatlanma bilen bellediler we häzirki syýasy geňeşmeleriň geçirilmeginiň türkmen-palestina özara gatnaşyklarynyň ösmegine goşant goşýan möhüm mehanizmleriň biridigini bellediler. Iň ýokary we ýokary derejede saparlaryň guralmagynyň ähmiýeti hem nygtaldy.
Hyzmatdaşlygyň dürli ugurlaryndaky ikitaraplaýyn gatnaşyklary güýçlendirmek üçin özara maslahatlaşmalar mehanizminiň netijeliligi, şeýle hem abraýly halkara guramalarynyň platformalarynda gatnaşyklary ösdürmekde syýasy geňeşmeleriň ähmiýeti barada bellenildi.
Geňeşmeleriň dowamynda türkmen tarapy täze gatnaşyklary ýola goýmak we hyzmatdaşlyk meselelerini ara alyp maslahatlaşmak maksady bilen hususy we döwlet pudaklarynyň wekilleriniň gatnaşmagynda işewürlik geňeşini geçirmegi teklip etdi.
Medeni-ynsanperwer ugurda gatnaşyklary giňeltmegiň ähmiýeti bellenildi. Taraplar ylym, saglygy goraýyş we bilim ugurlaryndaky hyzmatdaşlyk barada pikir alyşdylar.
Duşuşygyň ahyrynda ikitaraplaýyn gatnaşyklary mundan beýläk-de ösdürmek maksady bilen iki ýurduň Daşary işler ministrlikleriniň ministrleriniň, orunbasarlarynyň we bölümleriniň ýolbaşçylarynyň derejesinde geňeşmeleri dowam etdirmegiň zerurlygy nygtaldy.