Futbol boýunça DÇ-2026-nyň saýlamasynyň ikinji tapgyryndan orun alan duşuşykda Türkmenistan myhmançylykda Gonkongyň ýygyndysy bilen deň oýnady. Gonkong stadionynda geçirilen oýun 2:2 hasabynda tamamlandy.
Türkmen ýygyndysynyň düzüminde Ruslan Mingazow iki gezek (4-nji we 36-njy minutda) tapawutlandy. Ýer eýeleri oýnuň dowamynda iki gezek yzda galandyklaryna garamazdan, Weý Wongyň we Ewerton Kamargonyň gollary bilen hasaby deňlemegi başardylar.
E toparçasyndan orun alan ikinji oýunda Özbegistan öz öýünde Eýran bilen 2:2 hasabynda deň oýnady. Daşkentde geçirilen oýunda myhmanlaryň iki gol aratapawudy öňe geçip, soňra bilen arkaýynlaşmagy netijesinde, özbek futbolçylary ikinji ýarymda ýeňlişden halas bolmagy başardylar.
Şeýlelikde, häzirki wagtda E toparçada Eýran 4 utuk bilen liderlik edýär. Ikinji orundaky Özbegistanda hem 4 utuk bar. Türkmenistanyň we Gonkongyň bolsa hersinde 1 utuk bar.
DÇ-2026-nyň saýlamasynyň ikinji tapgyrynyň nobatdaky oýunlary 2024-nji ýylyň mart aýynda geçiriler. Geljek ýylyň 21-nji martynda türkmen futbolçylary myhmançylykda Eýrana garşy meýdança çykarlar. 26-njy martda bolsa Türkmenistan Aşgabatda Eýrany kabul eder.