Aşgabatda we Türkmenabatda güýçli gar ýagýar. Azatlyk Radiosynyň habarçylary bu barada 9-njy ýanwarda öýlän habar berdiler.
Türkmenistanda agyr garyň ýagmagyna garaşylýandygy “Metteožurnalyň” 5-nji ýanwarda beren habarynda aýdyldy. Türkmenistanda şu hepdäniň başyndan anomal sowuk howanyň bolmagyna, howanyň derejesiniň käbir ýerlerde adaty klimat kadalaryndan 10-16 gradus aşak gaçmagyna garaşylýar diýlip maglumatda aýdyldy.
Türkmenabatdaky habarçymyz garyň ýagmagynyň türkmenabatlylar üçin garaşylmadyk ýagdaý boladygyny, sebäbi döwlet telewideniýesiniň garyň ýagjagy barada ýeterlik maglumat bermändigini belleýär.
Watan habar gullugynyň 8-nji ýanwarda beren maglumatynda garyň ýagjagy çala agzalyp geçildi. Döwlet telewideniýesiniň maglumatynda 9-njy ýanwarda "gar gatyşykly ýagyşyň ýagmagyna garaşylýar" diýildi.
Şol bir wagtda, hökümetçi “Türkmenportal” neşiri Türkmenistanyň günorta-gündogarynda ýagmagyna garaşylýan güýçli gar barada has anyk habar bermäge çalyşdy. Çaklamalara görä, gar 9-10-njy ýanwar gijesinde ýagyp başlar we 10-njy ýanwara çenli dowam eder, onuň galyňlygy 10 — 15 sm bolar öýdülýär diýlip, maglumatda aýdyldy.
Hökümetçi neşir şu gün agşam Aşgabatda howanyň temperaturasynyň -3-e düşjegini, gije -6 gradus aýaz boljagyny duýdurdy.
Türkmen metbugaty adatça adamlaryň durmuşyna täsir ýetirjek güýçli howa üýtgemeleri barada öňünden anyk maglumat bermeýän bolsa-da, bu gezekki garly howa “Watan” habarlar programmasynda agzalanda Daşoguzda gije 16-21 gradus, gündiz 9-14 gradus boljagy ekrandan görkezildi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPNulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.