Möwsümiň 7-nji “Masters” (Ussatlar) ýaryşy “Sinsinnati Masters” tennis bäsleşiginde erkekleriň arasynda Nowak Jokowiç, zenanlardan Kiki Bertens ýeňiş gazandy.ABŞ-nyň Ohaýo ştatynda geçirilen ýaryşyň erkekleriň arasyndaky finalynda serbiýaly Nowak Jokowiç bilen bu ýaryşda 7 çempionlyk gazanan şweýsariýaly Rojer Federer duşuşdy.
Iki tennisçi mundan ozalam 46 gezek gabatlaşyp, şolaryň 23-sinde Jokowiç ýeňiş gazanypdy.Iki setde-de 6:4 hasaplar bilen garşydaşyny ýeňlişe sezewar eden Jokowiç, bu ýerde ilkinji çempionlygyna mynasyp boldy. Şeýlelikde, 31 ýaşyndaky Jokowiç 9 “Masters” (“Indian Wells Masters”, “Maýami Açyk”, “Monte-Karlo Masters”, “Madrid Açyk”, “Italiýa Açyk”, “Kanada Açyk”, “Sinsinnati Masters”, “Şanhaý Masters”, “Pariž Masters”) ýaryşynyň ählisinde-de çempionlyk gazanan ilkinji tennisçi bolmagy başardy.
Federeriň, Nadalyň hem-de Mýurreýiň 1991-nji ýyldan bäri geçilip gelinýän” Masters” ýaryşlarynyň 7-sinde çempionlygy bar.Galyberse-de, 70-nji ATP çempionlygyny gazanan Nowak Jokowiç 31-nji “Masters” kubogyny asmana göterdi.
Ol bu babatda 33 kubokly Nadaldan soň, 2-nji hatarda barýar.
“Sinsinnati Masters” ýaryşynda zenanlaryň arasynda gollandiýaly Kiki Bertens bilen soňky wagtlarda çempionlyklar gazanýan rumyniýaly Simona Halep duşuşdy. 1-nji setde Halep 6:2 ýeňiş gazandy.Soňabaka ýadawlygy duýlup başlan, mundan 1 hepde öň “Kanada Açykda” çempion bolan Halep 2-nji setde taý-brekden soň, 7:6 asgyn geldi. 3-nji setde-de Bertens 6:2 hasaby bilen güýçli garşydaşyny ýeňip, karýerasyndaky iň uly çempionlygyna mynasyp boldy.
Bu ýeňiş 26 ýaşly tennisçiniň 6-njy WTA çempionlygy bolup, ol 17-nji basgançakdan 13-nji orna beýgeldi.Sanawyň lideri Halep bolsa, bu ýaryşda bassyr 2-nji, umumylykda-da 3-nji gezek finalda utuldy.
Bertensiň şu ýaryşda finala çenli Karolina Wozniaski, Elina Switolina, Petra Kwitowa ýaly tennisçileri ýeňlişe sezewar edendigini hem belläliň.