Palestinanyň resmi habarlar agentligi WAFA-nyň Gazada başdan geçirilýän wakalara esaslanyp beren habaryna görä, Refah şäherindäki Şabbura bosgun düşelgesinde al-Hamaýde maşgalasynyň öýüni nyşana alan Ysraýylyň harby uçarlary 1-i zenan jemi 5 adamy öldürdi.
Gazanyň demirgazygynda binalaryň birini nyşana alan Ysraýylyň harby uçarlarynyň hüjümi netijesinde 1 adam ýogaldy we ençeme adam ýaralandy.
Ysraýylyň uçarlary we artilleriýa birikmeleri Gazanyň Tel al-Hewa sebitindäki Iýerusalim hassahanasynyň töweregini, Şaty we al-Megazi bosgun düşelgelerini, Zeýtun etrapçasyny we Beýt Habub sebitindäki ençeme ýeri bombalady. Hüjümleriň netijesinde ençeme adam ýogaldy we ýaralandy.
Palestinanyň Gyzyl ýarymaý jemgyýeti Ysraýylyň harby uçarlarynyň Iýerusalim hassahanasynyň töweregine 2 aýry raketa bilen hüjüm gurandygyny habar berdi. Jemgyýet halkara kömek guramalaryna Gaza we demirgazyk sebite gyssagly kömekleriň ýetirilmegi barada çagyryş berdi.
Beýleki tarapdan hassahanadaky habar çeşmeleri Iýerusalim, Awde we Indoneziýa hassahanalarynda ýangyjyň gutaryp barýandygyny, Indoneziýa hassahanasynyň käbir bölümleriniň hyzmat bermegini bes edendigini habar berdiler.
Mundan başgada Büreýç bosgun düşelgesindäki metjitleriň biriniň Ysraýylyň harby uçarlary tarapyndan nyşana alynyp hüjüm guralandygy aýan edildi.
Hamasyň harby şahasy Kassam topary 7-nji oktýabrda Ysraýyla garşy "Aksa tupany" ady bilen giň gerimli hüjüm başladandygyny habar beripdi.
Ysraýylyň goşuny hem şoňa jogap hökmünde harby uçarlary bilen Gaza garşy "Demir Gylyçlar" operasiýasynyň başladylandygyny mälim edipdi.
Başdan geçirilýän hadysalar sebäpli taraplaryň ikisinden hem müňlerçe adam ýogaldy.
Ysraýylyň goşuny bilen Hamasyň arasynda 8-nji oktýabrdan bäri wagtal-wagtal garşylyklaýyn hüjümler guralýar.