Saud Arabystany Patyşalygynda 1 million gektardan gowrak meýdanda 159 milliondan gowrak agaç nahaly ekilip, çölleşmek bilen göreşmekde uly sepgide ýetildi. Ýurtda 2,5 million gektar meýdanyň tokaýlaşdyrylmagy maksat edinilýär.
Saudi Green Initiative maksatnamasynyň çäklerinde uzak möhletde jemi 10 milliard düýp agaç nahalynyň oturdylmagy göz öňünde tutulýar.Tokaýlaşdyrylan meýdanlar ýygnalan ýagyş suwy bilen damjalama usulynda suwarylýar.Deňiz kenarlarynda bolsa, arassalanan deňiz suwuny ulanmak arkaly mangrow tokaýlary döredilýär. 2050-nji ýyla çenli dowam etdiriljek maksatnamanyň çäklerinde ýurduň 13 sebitinde 350 görnüşli ösümlik ekilýär.
BMG-niň Çölleşmäge garşy göreş konwensiýasy (UNCCD) bu taslama ýokary baha berýär. Saud Arabystany Patyşalygy 17-28-nji awgust aralygynda Mongoliýanyň paýtagty Ulan-Batorda geçiriljek UNCCD COP17 maslahatynda bu taslamanyň netijeleri bilen tanyşdyrar. Saud Arabystany Patyşalygy COP17 maslahatynda mundan ozalky maslahatyň (COP16) ýer eýesi hökmünde çykyş eder.