7-nji martda Türkmenistanyň Prezidenti Serdar Berdimuhamedow Ministrler Kabinetiniň nobatdaky mejlisini geçirdi, onda senagat, energetika, ulag we gurluşyk ulgamlaryny ösdürmek, medeni we ylmy çäreleri geçirmek, şeýle hem halkara hyzmatdaşlygyny pugtalandyrmak boýunça meseleler ara alnyp maslahatlaşyldy.
Öňde boljak çäreler
1719-njy martda Aşgabatda ýurduň Senagatçylar we telekeçiler birleşmesiniň 200-den gowrak agzasynyň gatnaşmagynda sergi we Birleşmäniň döredilmeginiň 16 ýyllygyna bagyşlanan maslahat geçiriler. Çärelerde hususy pudagyň gazananlary görkeziler we onuň mümkinçiliklerini ýurdy durmuş-ykdysady taýdan ösdürmek boýunça döwlet maksatnamalarynyň çäginde netijeli peýdalanmak boýunça meseleler ara alnyp maslahatlaşylar.
21-nji martda Ahal welaýatynyň çägindäki Nowruz ýaýlasynda, welaýatlaryň dolandyryş merkezlerindäki, Aşgabat we Arkadag şäherlerindäki baýramçylyk meýdançalarynda Milli bahar baýramy Halkara Nowruz güni mynasybetli baýramçylyk dabaralary geçiriler.
2526-nji aprelde Türkmenistanda Gadymy Amul galasy: geçmişiň syrlarynyň goragçysy atly halkara ylmy-amaly maslahat geçiriler.
Maliýe we ykdysadyýet
Türkmenistanda açyk görnüşli paýdarlar jemgyýetleriniň birnäçesi Azyk senagaty döwlet birleşiginiň garamagyna berler. Türkmenistanyň ilatynyň ýokary hilli azyk önümleri bilen üpjünçiligini gowulandyrmak maksady bilen, paýdarlar jemgyýetleriniň binýadynda süýt önümlerini we ýag öndürýän zawodlary döretmek baradaky teklip hödürlenildi.
Ýangyç-energetika toplumy
Türkmenistanda uglewodorod serişdeleriniň önümçiligini artdyrmak maksady bilen, Türkmennebit döwlet konserni nebitgazly känlerde çuňlugy 7 müň metrden geçýän guýularda barlag işlerini geçirmek hem-de täze çuň guýulary burawlamak üçin täze enjamlar bilen üpjün ediler.
Gurluşyk
Aşgabat şäheriniň G.Kulyýew köçesi bilen Täze zaman ýaşaýyş toplumyna barýan awtomobil ýolunyň kesişýän ýerinde döwrüň talaplaryna we halkara ölçeglere laýyk gelýän täze awtomobil köprüsi gurlar.
Halkara hyzmatdaşlygy
Türkmenistanda BMG we onuň ähli düzüm birlikleri bilen hyzmatdaşlygy ulgamlaýyn esasda alyp barmak üçin Türkmenistan — Birleşen Milletler Guramasy strategik maslahat beriş geňeşi dörediler.Geňeş BMG-niň ýöriteleşdirilen edaralary bilen taslamalary taýýarlamak we tassyklamak bilen bagly işleri utgaşdyrmak, halkara başlangyçlary öwrenmek, olara goşulmak we goldamak babatda teklipleri taýýarlamak, milli meýilnamalaryndan gelip çykýan wezipeleriň ýerine ýetirilişine syn etmek ýaly işleri alyp barar.
Ulag
Türkmenistanda ýolagçy we ýük otlularynyň hereket howpsuzlygyny üpjün etmek maksady bilen, demir ýollarynda döwrüň talaplaryna laýyklykda yzygiderli düýpli abatlaýyş işleri geçiriler. Munuň özi ýurduň demir ýol ulaglary pudagynyň maddy-enjamlaýyn binýadyny pugtalandyrmaga mümkinçilik döreder.