1 Türkmenistanyň paýtagtynda Halkara ulag-üstaşyr geçelgeleri: özara arabaglanyşyk we ösüş atly halkara maslahaty öz işini dowam edýär. Foruma 400-den gowrak wekiliýet gatnaşýar, şolaryň 170-den gowragy daşary ýurt kompaniýalaryň wekilleri we 90 sany ýerli kompaniýalardan ybarat.
2. Türkmenistanyň Saglygy goraýyş we derman senagaty ministrliginiň maglumat merkeziniň hünärmenleri howanyň yssy günlerinde Gün şöhlesinden goranmak üçin maslahatlary taýýarladylar.
3. Türkmenistanyň Pensiýa gaznasy sms-habarnamalary arkaly ýurdumyzyň raýatlaryna döwlet pensiýa ätiýaçlandyrmasy üçin gatançlary Türkmenistanyň Zähmet we ilaty durmuş taýdan goramak ministrliginiň resmi web-saýtynda onlaýn görnüşde tölemegiň mümkindigini habar berdi.
4. Türkmenistanly gyzlardan düzülen Electric Currents topary görüşiň derejesini barlaýan we ony gowulandyrmak üçin maslahatlary berýän Clear Vision mobil goşundysyny işläp düzdi. Goşundyda görüşiň derejesini barlamak üçin test, gözler üçin maşklar, dogry iýmitlenmek we peýdaly endikleri edinmek üçin maslahatlar, şeýle hem gözüň saglygy hakynda gyzykly maglumatlar ýerleşdirilendir.
4. Özüniň et we şöhlat önümleri bilen Türkmenistanda meşhurlyk gazanan Bereketli hojalyk jemgyýeti öndürýän harytlarynyň görnüşlerini artdyrdy, täze harytlaryň hatarynda towuk wetçinasy, buglanan göle eti we Çemen şöhlatlary bar.
5. Tatarstan Respublikasynyň Prezidenti Rustam Minnihanow telegram-kanalda öz itiniň Akdus atly türkmen alabaýynyň suratyny ýerleşdirdi. Biziň Akdusymyz, ine, şeýle boldy. Uly, güýçli, gowy it bolup ýetişdi! diýip, Minnihanow öz agzalary bilen paýlaşdy.
6. 21-nji iýulda Çolpan Atada Merkezi Aziýa döwletleriniň Baştutanlarynyň konsultatiw duşuşygy geçiriler. Foruma Türkmenistanyň Prezidenti Serdar Berdimuhamedow gatnaşar.
7. Öýde abatlaýyş işlerini tamamlamak mümkin däl, ony diňe goýup bolýar diýýärler. Bu dogry, emma bellibir derejede. Eger abatlaýyş işleriniň köplenç näme sebäpli soňa goýulýandygyny bilseňiz, onuň bilen yzygiderli meşgullanmakdan gaça durup bilersiňiz. Bu makalada abatlaýyş işlerini tiz wagtda tamamlamak üçin esasy maslahatlar toplanyldy.
8. Aýdymçy Jennifer Lopes we aktýor Ben Afflek ilkinji nikalaryndan 20 ýyl soň resmi taýdan är-aýal diýlip yglan edildiler. Nika dabarasy 16-njy iýulda, şenbe güni Las-Wegasda geçirildi. Mälim bolşuna görä, Jennifer Lopes äriniň familiýasyna geçer we resmi taýdan Jennifer Linn Afflek bolar.
9. 18-nji iýuldan başlap Özbegistanyň we Russiýanyň arasynda awtobus gatnawy dikeldiler, bu gatnaw iki ýyl mundan öň COVID-19 pandemiýasy sebäpli ýatyrylypdy. Daşkent Moskwa ugry boýunça gatnawlar hepdede iki gezek duşenbe we penşenbe günleri, Daşkent Kazan ugry boýunça sişenbe we anna günleri, Daşkent Sankt-Peterburg ugry boýunça bolsa çarşenbe we şenbe günleri amala aşyrylar.
10. Duşanbede Merkezi Aziýanyň futbol Assosiasiýasynyň (CAFA) milli zenanlar ýygyndylarynyň arasyndaky çempionatynyň dördünji tapgyrynyň duşuşyklary geçirildi. Nobatdaky tapgyrda altyn medalyň esasy dalaşgärleri Özbegistanyň we Eýranyň milli ýygyndylary uly hasap bilen ýeňişler gazandylar. Özbegistanyň topary Gyrgyzystandan üstün çykdy (7:0), eýranly zenan futbolçylar bolsa Türkmenistanyň ýygyndysyny ýeňmegi başardylar (4:0).
11. Sürüji türgen Dmitriý Sotnikowyň ýolbaşçylygyndaky Russiýanyň KAMAZ-master topary Ýüpek ýoly ralli-reýdiniň jemleýji tapgyrynda ýük ulaglarynyň arasynda ýeňiji boldy. Bu Sotnikow üçin marafonlarda gazanylan dördünji ýeňişdir, ol 2013, 2017 we 2021-nji ýyllarda birinji orunlary eýelemegi başarypdy.