Prezident Gurbanguly Berdimuhamedow ýurdumyzyň halkynyň we Hökümetiniň adyndan hem-de hut öz adyndan jenap Serjio Mattarella Italiýa Respublikasynyň Prezidenti wezipesine gaýtadan saýlanylmagy mynasybetli tüýs ýürekden gutlaglaryny we iň gowy arzuwlaryny iberdi.
Döwlet Baştutany öz hatynda soňky ýyllarda Türkmenistan bilen Italiýa Respublikasynyň arasyndaky dürli ugurlar boýunça ýola goýlan hyzmatdaşlygyň netijeliligi, özara bähbitliligi we işjeň häsiýeti bilen tapawutlanýandygyny belläp, bu gatnaşyklary täze derejelere çykarmak üçin zerur işleri bilelikde dowam etmäge taýýardygyny tassyklady.
TmCars.info-nyň ozal habar berşi ýaly, Serjio Mattarella respublikanyň parlamentiniň iki palatasynyň bilelikdäki mejlisinde geçirilen ses berişligiň sekizinji tapgyrynda Italiýanyň prezidenti wezipesine gaýtadan saýlanyldy. Prezident saýlanmak üçin absolýut köplügi (50%-den gowrak), ýagny 505 ses almak ýeterlikdi. Özüniň ilkinji ýedi ýyllyk mandatyny tamamlaýan Mattarella üçin parlament agzalarynyň we sebit wekilleriniň hataryndan saýlawa gatnaşyjylaryň 759-sy ses berdi.