Şu hepdeden başlap, Hindistanyň kinoteatrlarynda ýurduň Bolliwud studiýasynda täze surata düşürilen filmler görkezilýär. Olaryň ilkinjisi bilen Mumbaýyň ýaşaýjylary eýýäm tanyş boldular.
Deprekleriň gümmürdisiniň, tanslaryň, dürli reňkli sepilýän tozlaryň astynda Mumbaýda täze filmiň ilkinji görkezilişi badalga aldy, hindiler uzaga çeken pandemiýadan soň, indi ilkinji gezek şeýle dabarany başdan geçirýärler: kinotetarlar öz gapylaryny tomaşaçylara açdy.
“Biz bir ýarym ýyllap täze filme tomaşa etmek mümkinçiliginden mahrum bolduk, ine, ahyry bu bagt bize miýesser etdi” diýip, ýerli ýaşaýjylar aýdýarlar. Kinoteatrlaryň daş-töweregi mahelleden hyň berýär.
Hindistanda kinoteatrlar 2020-nji ýylyň mart aýynda koronawirus zerarly ýapylypdy, şunça wagtlap hem täze film surata düşürilmändi. Öň her ýyl Bolliwudda ýylda bir müň çemesi film döredilýärdi.
Netijede, 18 aýda kompaniýa öz girdejileriniň çärýek bölegini ýitirdi.Bu gün bolsa, prokata “Surýawanşi” atly täze film goýberildi, onda hindileriň iň söýgüli artistleriniň biri Akşaý Kumar baş keşbi janlandyrýar.
Film eýýämden adamlary magnit kimin çekýär, kinoteatrlaryň petek satylýan ýeri dyknyşyk.Akşaýyň janköýerleriniň arasynda 100 kilometrlik ýol söküp gelenleri hem bar.Olar hindi filmlerine öýde däl-de, kinoteatrda köpçülik bolup tomaşa etmegiň lezzetlidigini aýdýarlar.
Ýakyn günlerde başga bir hindi ýyldyzy Amir Hanyň täze filminiň prokata çykmagyna garaşylýar, ol filmde täsin adamyň keşbini janlandyrypdyr, aktýoryň nusgawy amerikan filmi “Forrest Gampyň” äheňinde surata düşüren filminiň gürrüňi köpden bäri ýurda doldy.
Hindiler üçin kino tomaşa etmek hakyky baýramçylyk, filmde aýdym ýaňlanyp ugradygy, tomaşaçylar ýerlerinden turup, hyjuwly tans etmäge başlaýarlar. Galyberse-de, köpler üçin kino— maglumat çeşmesi, sebäbi ilatyň tas 40 göterimi sowatsyz, onsoň, olar daşky dünýä bilen kino arkaly tanyşýarlar diýip, hindi kino resurslary ýazýar.