Kongres Baýdeniň ýeňşini tassyklady.ABŞ-nyň Kongresiniň Senaty we Wekiller palatasy bilelikdäki maslahatynda Jozef Baýdeniň 3-nji noýabrda ýurtda geçirilen Prezident saýlawlaryndaky ýeňşini tassyklady. Ýurtda hereket edýän kanunçylyga görä, Prezident saýlawlarynda ýeňiş gazanan dalaşgäriň wezipesi saýlaw wekilleriniň 270-siniň sesini almagy bilen tassyklanýar.
Baýdeniň kasam kabul edişlik dabarasy 20-nji ýanwarda Waşingtonyň Kapitol baýrynda ýerleşýän Kongresiň binasynda guralar.
Dalaşgärlerini hödürleýär.ABŞ-nyň Prezidenti wezipesine saýlanan Jozef Baýden ABŞ-nyň Rod-Aýlend ştatynyň gubernatory Jin Raýmondy söwda ministri wezipesine we Massaçusets ştatynyň Boston şäheriniň meri Martin Wolşy ABŞ-nyň Zähmet ministri wezipesine hödürledi.
J.Baýden Delawer ştatynyň Wilmington şäherinde geljekki dolandyryşda möhüm wezipelere dalaşgärler bilen duşuşdy.J.Raýmond we M.Wolşdan başga-da, ABŞ-nyň kiçi telekeçilik administrasiýasynyň başlygy wezipesine dalaşgär hödürlendi.
Saýlawlarda ýeňiş gazandy. 10-njy ýanwarda Gyrgyz Respublikasynda geçirilen Prezident saýlawlarynda sesleriň 98,02 göterimi sanalandan soň Sadyr Japarow 79,20 göterim ses alyp, ýeňiş gazandy.Adakhan Madumarow 6,69 göterim ses bilen ikinji ýeri eýeledi.
Iň soňky maglumatlara görä, saýlawlara gatnaşyk 39,75 göterime deň boldy.Döwlet Baştutany wezipesine 17 dalaşgär gatnaşdy.Birinji tapgyrda ýeňiş gazanmak üçin ýaryşyň lideri sesleriň ýarysyndan gowragyny almalydy.
Parlament saýlawlary geçirildi. 10-njy ýanwarda Gazagystanda geçirilen Parlament saýlawlarynda dolandyryjy Nur Otan (Watan nury) partiýasy sesleriň 72 göterimine eýe bolup, ýeňiş gazandy.Aşaky palatanyň düzümine zerur 7 göterim päsgelçiligi ýeňip geçen Gazagystanyň Demokratik partiýasy Ak žol (Ak ýol) we Gazagystanyň Halk partiýasy hem girer.
Bu syýasy güýçleriň üçüsi hem Parlamentiň häzirki düzüminde görkezilýär.Saýlawlara ýurtda hasaba alnan partiýalaryň altysyndan bäşisi gatnaşdy.
Şwed kompaniýasynyň täze sanawy. Şweýsariýanyň Henley & Partners kompaniýasy pasportlaryň özüne çekijiligi baradaky sanawyny mälim etdi.Seljerijiler pasport eýeleriniň wizasyz syýahat etmek mümkinçiliklerine esaslandylar.Bu ýyl birinji ýerde raýatlaryna 191 ýurda ýol açýan Ýaponiýa boldy.
Reýtingiň ikinji hatarynda Singapur (190 ýurt) bar. Üçünji ýeri Günorta Koreýa we Germaniýa (189 ýurt) eýeleýär.Ispaniýa, Italiýa, Finlýandiýa we Lýuksemburg dördünji orny eýeledi.
Kasam kabul etdi.Gananyň Prezidenti Nana Akufo-Addo ikinji gezek döwlet Baştutany wezipesini ýerine ýetirmek üçin kasam kabul etdi.Prezident ikinji döwürde ýurduň abadançylyk we ösüş ýoluna başlamagyna kömek etmek üçin tagallalaryny gaýgyrmajakdygyny aýtdy.
Ol döwlet gurluşynda halky agzybirlige çagyrdy.N.Akufo-Addo 1944-nji ýylyň martynda dünýä indi. 2016-njy ýylyň dekabrynda ilkinji gezek Gananyň Prezidenti wezipesine saýlandy we 2020-nji ýylyň 7-nji dekabrynda ýene-de Prezident saýlawlarynda ýeňiş gazandy.
Mongoliýanyň ilaty artýar. Mongoliýanyň ilaty 2020-nji ýylyň ahyryna çenli 3 million 364 müň 622 adama ýetdi. Bu bolsa geçen ýylyň degişli döwri bilen deňeşdirilende 1,8 göterim köpdür. Bu barada ýurduň Milli statistika komiteti yglan etdi. Bu döwürde Mongoliýanyň ilaty 62 müň 339 adam artdy.
Skottuň toparyndan galan iýmit.Täze Zelandiýanyň barlag geçirijileri Antarktidanyň iň köne jaýy diýlip atlandyrylýan Ader burnundaky bir agaç jaýdan daşy gaplanan önüm tapdylar.Gabyň içinden mundan bir asyr ozal Angliýada öndürilen taýýar iýmit çykdy.
Kagyza dolangy tort, daşy poslan tüneke gabyň içinde abat saklanyp, biziň günlerimize çenli gelip ýetipdir.Bilermenler bu iýmitiň iňlis barlag geçirijisi Robert Skottuň 1910-1913-nji ýyllar aralygynda guralan Terra Nowa ekspedisiýasynyň agzalary tarapyndan galdyrylyp gidilendigini tassyklaýarlar.
The post Dünýä habarlary gysga setirlerde appeared first on Zaman Türkmenistan.