Ertir ― 15-nji martda AFK-nyň Çempionlar ligasynda saýlama duşuşyklar geçiriler. Olarda toparlar ýaryşyň toparçalaýyn tapgyryna gatnaşmak üçin göreşerler.
Ertir gündogar sebitde dört (bäş bolmalydy, biri ýatyryldy), günbatar sebitde bolsa üç ― jemi ýedi duşuşyk geçiriler. Türkmenistanly futbol janköýerlerini şolaryň ikisi ýakyndan gyzyklandyrýar.
Olaryň biri günbatar sebitdäki Bani Ýas (BAE) ― Nasaf (Özbegistan) duşuşygydyr. Bu duşuşygyň ýeňijisi E toparçanyň wekili bolar. Häzir bu toparçada Kataryň Al-Sadd, Saud Arabystanynyň Al-Feýsali we Iordaniýanyň Al-Ramta toparlary bar.
Nasaf ertirki duşuşykda ýeňiş gazanyp bilse, AFK-nyň Çempionlar ligasynyň şu möwsümine Özbegistandan wekilçilik etjek ikinji topar bolar. Eger Garşy şäheriniň topary muny başarmasa, AFK-nyň kubogynda, geçen ýylky ýaly, ýurdumyzyň çempiony Altyn asyryň garşydaşy bolar. Nasaf AFK-nyň Çempionlar ligasyna gatnaşyp bilse, yklymyň ikinji derejeli ýaryşynda Altyn asyr bilen bir toparçada Özbegistandan Sogdiana ýaryşar.
Gündogar sebitdäki Wissel Kobe (Ýaponiýa) ― Melburn Wiktori duşuşygynyň ýeňijisi AFK-nyň Çempionlar ligasynyň J toparçasyna goşular. Bu toparçada Gonkongyň Kitçi toparynyň hem ýaryşýandygyny ýatladýarys. Topar ýakynda türkmenistanly ýarym goragçy Ruslan Mingazowy düzümine goşupdy.
Umuman, ertir AFK-nyň Çempionlar ligasynyň saýlama tapgyrynda aşakdaky duşuşyklar bolar:
Gündogar sebit:
Ulsan Hýonde (Ýaponiýa) ― Port (Tailand), Ulsan şäheri, Ulsan Munsu stadiony. Başlanjak wagty: 15:00 (Aşgabat wagty bilen).
Wissel Kobe (Ýaponiýa) ― Melburn Siti (Awstraliýa), Kobe şäheri, Noýewir stadiony. Başlanýan wagty: 15:00.
Tegu (Ýaponiýa) ― Buriram Ýunaýted (Tailand), Tegu şäheri, Tegu stadiony. Başlanýan wagty: 15:30.
Çançun Ýataý (Hytaý) ― Sidneý, duşuşyk ýatyryldy.
Günbatar sebit
Al-Tawun (Saud Arabystany) ― Al-Jaiş (Siriýa), Buraýda şäheri, King Salman Sport Siti stadiony. Başlanjak wagty: 20:50.
Şarja (BAE) ― Al-Zawra (Yrak), Şarja şäheri, Şarja stadiony. Başlanýan wagty: 21:15.
Bani Ýas (BAE) ― Nasaf (Özbegistan), Abu-Dabi şäheri, Baniýas stadiony. Başlanýan wagty: 21:15.