“Oskar” baýraklarynyň gowşurylyş dabarasy 25-nji aprelde birbada birnäçe ýerden, şol sanda Golliwudyň rowaýaty Dolby Theatre teatryndan ýaýlyma berler diýip, RIA Nowosti habar berýär.
Bir dabarany birbada birnäçe ýerden ýaýlyma bermek tejribesi geçen ýylyň sentýabr aýynda “Emmi” baýraklarynyň guramaçylary tarapyndan synag edilip görüldi. Alyp baryjy Jimmi Kimmel Los-Anželesdäki Staples Center-den alyp bardy we baýragyň ýeňijileri hem-de oňa dalaşgärler dürli ýerlerden ýaýlyma birikdiler.
Munuň nädip amala aşyryljakdygy baradaky giňişleýin maglumatlary guramaçylaryň birneme soň mälim etjekdigi aýdylýar. Şonuň bilen bir hatarda, dabaranyň “ABC” ýaýlymynda alnyp görkeziljekdigi bellenilýär.