20-nji dekabrda Türkmenistanyň Daşary işler ministrliginiň Halkara gatnaşyklary institutynda Parahatçylygyň ýaş çaparlary atly akyl-paýhas bäsleşiginiň III möwsüminiň IV saýlama oýny geçirildi. Beýik Magtymguly Pyragynyň taglymaty — umumadamzat gymmatlyklarynyň milli şamçyragy atly umumy şygar astynda geçirilýän III möwsümiň IV saýlama oýnunyň temasy Osman imperiýasynyň XVII-XVIII asyrlardaky halkara gatnaşyklary we daşary syýasaty diýip atlandyryldy.
Parahatçylygyň ýaş çaparlary atly akyl-paýhas bäsleşiginiň III möwsüminiň IV saýlama oýnuna Aşgabat şäherinden 2 sany, Ahal welaýatyndan 1 sany, Balkan welaýatyndan 1 sany, Daşoguz welaýatyndan 1 sany, Mary welaýatyndan 2 sany we Lebap welaýatyndan 1 sany mekdep okuwçysy gatnaşdy.
Çekeleşikli ýagdaýda geçen Parahatçylygyň ýaş çaparlary atly akyl-paýhas bäsleşiginiň III möwsüminiň IV saýlama oýnunda Aşgabat şäheriniň ýöriteleşdirilen 16-njy orta mekdebiniň 11-nji synp okuwçysy Medine Myratberdiýewa we Balkan welaýatynyň Balkanabat şäheriniň 17-nji orta mekdebiniň 11-nji synp okuwçysy Kürmämmet Nobatow ýeňiji bolmagy başardylar. Şeýlelikde, olar Parahatçylygyň ýaş çaparlary atly akyl-paýhas bäsleşiginiň III möwsüminiň ýarym final oýnuna gatnaşmaga hukuk gazandylar.
Bäsleşigiň ýeňijilerine, şeýle-de oňa gatnaşyjylara hemaýatkärler tarapyndan taýýarlanan gymmatbahaly sowgatlar, Türkmenistanyň Daşary işler ministrliginiň Halkara gatnaşyklary institutynyň degişli şahadatnamalary we Hormat hatlary gowşuryldy.