Tibo Kurtuadyr Eder Militaodan soň “Real Madridde” ýene bir ýyldyz oýunçy şikes aldy. Çempionatyň çägindäki “Selta” bilen geçirilen oýnuň başlarynda, has takygy 16-njy minutda şikes alan Winisius Junioryň öňümizdäki hepdelerde toparyna kömegi degmez.
Geçirilen lukman barlaglaryndan soň braziliýaly ýyldyz hüjümçiniň 4-6 hepde aralygynda meýdança çykyp bilmejekdigi mälim edildi.Junior şol döwürde “La Ligada” 5, Çempionlar Ligasynda 1 hem-de milli ýygyndydaky duşuşyklaryny goýbermeli bolar. 23 ýaşyndaky ýyldyz oýunçynyň “Real Madridiň” çempionatdaky “Hetafe”, “Real Sosiedad”, “Atletiko”, “Las Palmas” hem-de “Žirona” klublary bilen geçirjek duşuşyklarynda oýnap bilmez.
“Real Madridde” Kurtua bilen Militaonyň möwsümiň ahyrlarynda meýdança dolanmagyna garaşylýar. Täze transfer Arda Güleriň hem öňümizdäki 4-5 hepde toparyna kömegi degmez. Ozaldan şikesi bolan Seballos bilen Mendiniň hem nobatdaky tapgyrda meýdança çykmagyna garaşylýar.